Napo kuti Akristau ali lini pansi pa Cakutonga ca Mozeji, koma bzakutonga bziwiri bzikululetu—kufuna Mulungu na anzathu—bzimbatithandiza kuwona bzomwe Yahovayo ambafuna kuti ifepano ticite. (Mat 22:37-39) Lufoyi kwa Mulungu na kwa anzathu limbabwera lini lokha, tenepo tin’funika kucita nyongo yakukulisa lufoyiri. Kodi tingalikulise tani? Njira ibodzi ya kucitira bzimwebzi, ndiyo kuwerenga Bibliya nsiku zense. Tikambawerenga Bibliya ni pomwe timbakwanisa kudziwa makhalidwe na ‘ubwino bwa Yahova.’ (Psal 27:4) Ninga bzakutewera bzace, lufoyi lathu kuna iye limbakula ndipo tingambakumbuke ninga momwe iye ambakumbukira. Ndipo bzimwebzi bzin’dzatithandizambo kubvera bzakutonga bza Yahova, kuphatanidzambo cakutonga ca kufuna winango na mtima wense. (Ju 13:34, 35; 1Ju 5:3) Onani bzinthu bzitatu bzomwe bzingatithandize kuti kuwerenga kwathu Bibliya kukhale kwakudekeza:

• Kumbukirani, muciwona bzomwe munkuwerengabzo m’makumbukidwe mwanu. Pomwe munkuwerenga, bziyezezereni kuti muli pambutopo, onani bzomwe bzinkucitikabzo, bvani mafala ndipo bvanimbo kununcira. Ndipo bvanimbo momwe wanthuwo ankubvera.

• Cinjani momwe mumbawerengera. Werengani mwakukuwa, ayai bveserani audiyo ya mbali yomwe munkuwerengayo. M’mbuto mwa kuwerenga makapitulo yakutewerana, imwepo mungawerenge mbali yomwe ina bzakucitika bza wanthu. Mwaciratizo phatisani basa Kabukhu Kothandiza Kuphunzira Mawu a Mulungu pa misolo 4 na 16 kuti muwerenge bza moyo wa Jezu, ndipo werengani bzinembo bzense bzomwe bzandandalikidwa pa msoloyo. Werengani bukhulo mwakubverana na gole lomwe lidanembedwa.

• Werengani na Cakulinga Cakuti Mubvesese. Bziri bwino kwene-kwene kuwerenga kapitulo ibodzi pa nsiku mucimbakumbukira na kubvesesa bzomwe munkuwerengabzo, mbuto mwa kuwerenga makapitulo mazinji pomwe munkubvesesa lini. Kumbukirani thandauzo la nkhaniyo ndipo fufudzani. Werengani mareferensiya ndipo phatisani basa mapa. Fufudzani nfundo zomwe mulibe kubvesesa pomwe mukhawerenga. Bzikakwanisika malani nthawe ibodzi-bodzi yomwe mwamala pa kuwerenga kuti mukumbukire bzomwe mwawerengabzo.