Kere pya Nɛɛ Kraist naa le na kɛɛ̄ Lok Mozis, baɛ ye lok a kuī eera lo a le lo ewereloo Bari le lo ewereloo pya nɛɛ le ii gbaa le​—le gaa kɔ ue nyɔɔ pya nu Jɛhova i gbī aābah. (Mat 22:​37-39) Lo dua wereloo naa lu nu i bee mɛā yii nyɔɔ. Mɛ i si tam loo lo e ɛrɛ. Bu mɛ sīdee? Ziī sīdee na tɛ̄maloo ebuū Baibol dɛ̄dɛɛ̄ dee. Sɔ̄ i kɛɛrɛ nu akiiloo pya le le elap dogo Bari alu e’ɛm sere kɛ̄ bu Baibol, i muɛ̄ “le Jɛhova.” (Yɔɔ 27:4) E nu esira aabu na bee wereloo i ye ɛrɛ kumaloo e nyim, e i kɛɛrɛ nu dookɛ̄ alɛ kɛɛrɛ nu doo. Lo ama ezū i kɔ i sere pya lok Bari, gbaāloo kpɛ̄naloo esu i loo nɛ nyɔɔ pya dɔɔ̄na. (Jɔn 13:​34, 35; 1 Jɔn 5:3) Taa nu edoo kɔ i ɛrɛ biī aāloo buū Baibol lu e’ɛm sere kɛɛ̄ kɛ̄ ama:

• Kɛɛrɛ kɔ o le e lo kɛ̄, sa su o loo sere bu lo kɛ̄tɔɔ̄. Naa kɛɛrɛ kɔ o le e lo kɛ̄. E na o bee muɛ̄, dā, sa dānuloo a? Bu mɛ sīdee dee na nu bee dap tɔɔ̄loo pya a bee le lo kɛ̄ a?

• Sere baloo bu keekee sīdee. Pio nu o dap doo na: Buū siā nyɔɔ, ale o dap ɛp aābu o Baibol sɔ̄ o gaa bira lo a lu eyere bu gāmā o dā aba muɛ̄. Buū yube eloh akiiloo nɛɛ a gaa lu ekɔ nu kumaloo bu lo dɔ Baibol ale ziī ekobee ue, e a naale buū aā ziī dɔ Baibol yii ziī. Bu edoba, buū nu akiiloo Jizɔs aā Appendix A7 ale B12 a le bu New World Translation of the Holy Scriptures. Buū yube ekobee lo dɔ Kpa Kaɛ nu a le nɛ ziī ziī biradee aabu. Buū ziī ziī kpa a le bu Baibol dookɛ̄ alu e’ɛm nyɔɔ etaā doo.

• Buū lo edābeeloo. Būbuū ziī ekobee lo edābeeloo sa ɛrɛ ekɛɛrɛ nyɔɔ dɔbiī ee buū gbɛnɛ-edo kɛ̄ aba nyɔɔbee o buūe lɛɛ sa oo dābeeloo. Kɛɛrɛ kɛ̄ alu enɔɔ̄ doo. Nɔ dɛ̄dɛɛ̄ nu akiiloo. Su map le pya dɔɔ̄na ue a tɔgɛ nu akiiloo kɛ̄ a lu esu lo ue aā daā nu. Gbītɛ̄ kere alu ziī dɔ lo oo dābeeloo. Lo a waɛ, su kuma sɔ̄ o wee su buma a, ɛā ekɛɛrɛ nyɔɔ.