Dedevwo Ilele Kristi e vwa rha nyalele urhi i Moses na-a, ekama eduado eva na, re ne vwo ẹguọlọ kpahen Osolobrugwẹ ọrhẹ ereva ọwan, yẹ oborẹ i Jehova ọ ji guọlọ mie ọwan. (Mt 22:37-39) A vwa ha aruẹ ẹguọlọ ọrana riuku-u. Ene vi vwo yi. Izede ọgo? Izede ọghoghanren owu yẹ ọrẹ ene se i Baibol na kẹdẹkẹdẹ. Ọke ọwan e roro kpahen iruemru sansan rẹ Osolobrugwẹ o vwori ri ha uvuẹn i Baibol na, ọwan na mẹrẹn “erhumu ọrẹ i Jehova.” (Ps 27:4) Omarana, ẹguọlọ re vwo kpahiẹn nọ duarhọ, iroro ọwan nọ ji họhọ ọnẹyen. Ọnana no mwu ọwan nyalele ekama Osolobrugwẹ, ro surhobọmwu akama re ne dje ẹguọlọ phia rẹn awọrọ. (Joh 13:34, 35; 1Jo 5:3) O vwo irorẹdjẹ esa ri na ha userhumu rẹn ọwan riamerhen isese i Baibol na:

• Ha iroro ọnọ ruiruo, ne wu fi ẹhẹn rhẹ oborẹ we se na. Rorie taghene wu ha uvuẹn avwaye. Me wu na mẹrẹn, me wu ne rhon jeghwai sọrhiẹn? Me yọ nọ sabu rhiẹ iroro ihworho we se kpahan na?

• Ha ena sansan ruiruo. O vwo irorẹdjẹ ezẹko wu na sabu ha ruiruo: Se yi phia, yanghene kerhọ ọke rẹ ikpekporo na o kporo. Se kpahen ohworho owu yanghene urhomu-ẹmro owu uvuẹn i Baibol na, ukperẹ ono rhiẹ irhomu-ẹmro ri lele omoma aye. Jerẹ udje, ha Appendix A7 yanghene B12 rọ ha uvuẹn New World Translation of the Holy Scriptures e se kpahen i Jesu. Se ọsoso urhomu-ẹmro ra ha isese kẹdẹkẹdẹ na nurhe. Se ẹbe i Baibol na izede ra yarẹ aye lele.

• Se ne wu vwẹruọ ye. Re se urhomu-ẹmro owu kẹdẹkẹdẹ rhẹ ẹhẹn re ne vwẹruọ ye jeghwai roro kodo kpahiẹn, o rhomu ghwẹ ọrẹ ene se irhomu-ẹmro buebun fọkime a guọlọ se ọsoso aye hin. Roro kpahen erhirhiẹ na. Roro kpahen oborẹ o surhobọmwu. Ha imapu ọrhẹ ekete ra rionbọrhọ ruiruo. Guọlọ otọrẹ oborẹ wu vwe vwẹruọ ye. Uphẹn ọrhọ havwiẹ, ghwọghọ uchunu ọke wu ha se i Baibol na e roro kodo kpahen oborẹ wu seri na.