Кӕд киристӕнтти Моисеййи закъон ӕнхӕст кӕнун нӕ гъӕуй, уӕддӕр нӕмӕ абони Йеговӕ цӕмӕ ӕнгъӕлмӕ кӕсуй, уой цубуртӕй зӕгъӕн ес еци Закъони дууӕ сайрагдӕр фӕдзӕхстей дзурдтӕй – уарзӕ Хуцауи ӕма адӕни (Мф 22:37–39). Еци уарзондзийнадӕ ӕ мади губунӕй неке рахӕссуй. Ирӕзун кӕнун ӕй гъӕуй. Цума кутемӕй? Еу ӕхсидзгӕ мадзал ӕй Библи алли бон дӕр кӕсун. Библий Йегови менеугути туххӕй ци финст ес, уобӕл ку фӕссагъӕс кӕнӕн, уӕд фӕууинӕн «Йегови рӕсугъддзийнадӕ» (Пс 27:4). Уой фӕрци ӕй хъӕбӕрдӕр фӕууарзӕн ӕма уой хузӕн сагъӕс кӕнун фулдӕр райдайӕн. Ӕма нӕ уӕд фӕффӕндуй Хуцауи фӕдзӕхститӕ ӕнхӕст кӕнун, зӕгъӕн, иннети уодуӕлдай уарзтӕй уарзун (Ин 13:34, 35; 1Ин 5:3). Библи кӕсун дин ӕхцӕуӕндӕр уодзӕй ӕртӕ гъуддагей фӕрци:

• Ци фӕккӕсис, уой дӕ цӕститӕбӕл рауайун кӕнисӕ. Библи кӕсгӕй дӕ цӕститӕбӕл рауайун кӕнисӕ, цума дӕхуӕдӕг дӕр уоми дӕ. Ци си уинис? Ци си игъосис? Дӕ фийбӕл цӕхуӕн смӕгтӕ уайуй? Ке туххӕй кӕсис, етӕ, цума, цӕбӕл сагъӕс кӕнунцӕ?

• Аллихузи мадзӕлттӕй пайда кӕнисӕ. Дӕ бон ӕй Библи гъӕрӕй кӕсун кенӕ имӕ аудиоформати игъосун. Сӕртӕ фӕд-фӕди кӕсуни бӕсти дӕ бон ӕй цӕхуӕндӕр адӕймаг кенӕ фарстай туххӕй бакӕсун. Зӕгъӕн, брошюрӕй «Ӕрмӕг Библи иртасынӕн» 4 ӕма 16 хӕйттӕмӕ гӕсгӕ дӕ бон ӕй бакӕсун Йесой туххӕй. Кенӕ ба бакӕсисӕ, бони стих кӕцӕй ист ӕй, еци сӕр ӕгасӕйдӕр. Библий киунугутӕ ма ес бакӕсӕн, ка си кӕд ӕрцудӕй финст, уомӕ гӕсгӕ дӕр.

• Ци бакастӕ, уой балӕдӕрунбӕл байархаисӕ. Уотӕ ма гъуди кӕнӕ, куд фулдӕр бакӕсон, уотӕ хуӕздӕр, зӕгъгӕ. Уой бӕсти алли бон дӕр уӕддӕр еу сӕр бакӕсисӕ, ра ибӕл сагъӕс кӕнисӕ ӕма, ци бакастӕ, уой балӕдӕрунбӕл байархаисӕ. Базонисӕ, ци хабӕртти туххӕй бакастӕ, етӕ кӕд ӕма кӕми ӕрцудӕнцӕ, уой. Листӕг хабӕрттӕбӕл дӕр расагъӕс кӕнисӕ. Пайда кӕнӕ къартитӕй ӕма кӕсӕ, алли фарсбӕл астӕуӕй ци стихтӕ ес, уони. Кӕсгӕй дӕмӕ ци фарстатӕ фӕззинуй, уонӕй уӕддӕр еуемӕн дзуапп байагорисӕ. Гӕнӕн ку уа, уӕд кӕсгӕ цӕйбӕрцӕ бакодтай, сагъӕс кӕнунмӕ дӕр уойбӕрцӕ рӕстӕг рахецӕн кӕнисӕ.