MÄ MꞌU̱IHU̱ NGU YÄ KRISTIANU

Hanja dä za gä potꞌihu̱ rä mhäte po Äjuä ꞌne po mä mikꞌeihu̱

YʼO̱DE DE GÄ

Mäske mäpaya yä kristianu ya hindi ꞌmu̱ihu̱ obligado gä kumplihu̱ ko nuꞌu̱ yä Ley bi tꞌumbäbi Moisés, pe hää mähyoni gä pe̱fihu̱ nuya yoho yä däta mhända: gä mädihu̱ Äjuä ꞌne gä mädihu̱ mä mikꞌeihu̱ (Mt 22:37-39). Pe nunä mhäte hingä ma dä zo̱ho̱se̱, pe̱ꞌtsi te gä potꞌihu̱. ¿Te mähyoni gä pe̱fihu̱? Pe̱ꞌtsi te gä hetihu̱ rä Mäkä Tꞌofo hyaxtho ꞌne gä ntso̱ꞌmihu̱ te utkägihu̱ nuꞌu̱ yä hogä mꞌu̱i pe̱ꞌtsi rä Zi Dada Jeoba (Sl 27:4). Mu̱ gä pe̱fihu̱ njabu̱, mä mhätehu̱ po geꞌä mänꞌa ma dä te ꞌne ma gä mbenihu̱ ngu di mbeniꞌä. Geꞌä ma dä maxkägihu̱ pa gä o̱tehu̱ nuꞌu̱ yä mhända xä rꞌakägihu̱, por ejemplo, gä mädihu̱ mä mikꞌeihu̱ nsinke te gä to̱ꞌmihu̱ (Jn 13:34, 35; 1Jn 5:3). Jaua hñuu yä tsꞌofo nuꞌu̱ ma dä maxꞌäꞌi pa gi tini rä johya ora gi heti rä Mäkä Tꞌofo.

Usa ri imäjinäsio. Ora gi heti rä Mäkä Tꞌofo, ja ngue̱nda ge ja gi ꞌmahni ꞌne imäjinä ge gi handi ꞌne gi o̱de te thogi o asta gi pähä näꞌä te yu̱ni o te di senti nuꞌu̱ yä jäꞌi.
Usa märꞌa yä mfatsꞌi. Dä za gä hetihu̱ rä Mäkä Tꞌofo en voz alta o gä o̱xu̱ rä audio mientra di de̱nihu̱ rä lectura. En lugar de gä hetihu̱ rä Mäkä Tꞌofo dende habu̱ fu̱di, dä za gä imbestigahu̱ rä mꞌu̱i nꞌa de nuꞌu̱ yä jäꞌi no̱ni o gä huahnihu̱ mä nꞌa rä tema. Por ejemplo, ha yä sección 4-A, B, C, D, E, F, G ꞌne H ꞌne 16-A ꞌne B de rä foyeto Guía para el estudio de la Palabra de Dios dä za gä hetihu̱ mä nꞌa tu̱i rä imformasion de rä Hesu. Ora di hetihu̱ rä foyeto Examinando, dä za gä hetihu̱ gatꞌho näꞌä mꞌede de rä Mäkä Tꞌofo habu̱ bi thäi näꞌä testoꞌä. O ꞌnehe, dä za gä hetihu̱ nuꞌu̱ yä mfistꞌofo de rä Mäkä Tꞌofo ja ngu näꞌä orden bi tꞌofo kada nꞌa de geꞌu̱.
Ntiende näꞌä gi heti. Gä ntiendehu̱ näꞌä di hetihu̱, mänꞌa xä ñho ke gä hetihu̱ ndunthi ꞌne hinte gä ntiendehu̱. Ora gi heti rä Mäkä Tꞌofo, mbeni te mi thogi ha nuꞌu̱ yä paꞌu̱ nuꞌmu̱ bi tꞌofo näꞌä gi heti. Imbestiga yä detalle. Usa yä mäpa ꞌne nuꞌu̱ yä referencia di hñä. Imbestiga mäske ho̱nse̱ nꞌa de nuꞌu̱ yä punto hingä ntiende. Näꞌä tiempo gi usa pa gi heti rä Mäkä Tꞌofo, geꞌä rä tiempo dä hogi gi usa pa gi ntso̱ꞌmi de näꞌä gä heti.