Kristiannan no ta obligá di kumpli ku e Lei di Moises. Pero e dos mandamentunan di mas grandi di e Lei ei, esta, pa stima Dios i pa stima nos próhimo, ta resumí bon loke Yehova ta spera di nos. (Mat 22:37-39) Nos no a nase ta stima Dios i próhimo, p’esei nos mester kultivá e amor ei. Kon? Un manera importante ku nos por logra esei ta di lesa Beibel tur dia. Hasiendo esei, nos ta mira “e bunitesa” di Yehova i nos tin oportunidat di konosé e klase di Dios ku e ta. (Sl 27:4) Asina nos amor pa Yehova ta bira mas fuerte i nos ta siña pensa meskos kuné. Esaki lo motivá nos pa obedesé e mandamentunan di Dios, ku ta inkluí e mandamentu di stima nos próhimo, poniendo nan interes promé ku esun di nos. (Hua 13:34, 35; 1Hn 5:3) Wak tres sugerensia ku por yuda bo disfrutá mas di bo lesamentu di Beibel.

• Usa bo imaginashon i bo sentidonan. Durante e lesamentu, imaginá ku bo ta einan huntu ku e personahenan. Purba di wak e lugánan, skucha e zonidonan, hole e holónan. Purba di imaginá kon e hendenan ta sinti.

• Usa diferente método. Bo por lesa na bos haltu òf skucha e grabashon di lesamentu miéntras ku bo ta lesa. Na lugá di lesa e kapítulonan den sekuensia, bo por lesa e partinan ku ta papia di un asuntu òf un personahe. Por ehèmpel, bo por usa Sekshon 4 òf 16 di e foyeto chikitu Yudansa pa Studia e Palabra di Dios pa lesa tokante Hesus. Bo por lesa tambe henter e kapítulo ku e teksto di dia ta saká for di dje. Lesa e bukinan di Beibel den e sekuensia ku nan a ser skirbí.

• Lesa di manera ku bo ta komprondé. Na lugá di lesa yen di kapítulo djis pa lesa, lo ta mihó pa lesa ún kapítulo pa dia pa bo komprondé i meditá riba loke bo ta lesa. Pensa riba e konteksto i e detayenan. Lesa e referensianan i usa e mapanan. Investigá por lo ménos un punto di e lesamentu ku bo no a komprondé. Si ta posibel, dediká e mesun kantidat di tempu ku bo a usa pa lesamentu pa meditá riba loke bo a lesa.