Nomata olketa Christian no stap anda long Law bilong Moses, tufala law bilong hem for lovem God and lovem narawan showimaot wanem God laekem iumi for duim distaem. (Mt 22:37-39) Iumi no born witim diskaen wei for showim love. Hem samting iumi mas lane for showimaot. Wanfala wei for strongim love bilong iumi for God and narawan hem for readim Bible evriday. Taem iumi ting raonem wanem Bible talem abaotem God, iumi bae luksavve long “olketa gudfala wei blong hem.” (Sams 27:4) Datwan bae strongim love bilong iumi for hem, and helpem iumi for garem sem tingting olsem hem. Then iumi bae laek for obeyim olketa law bilong God, wea insaed diswan hem datfala law for lovem narawan. (Joh 13:34, 35; 1Jo 5:3) Tingim thrifala samting wea savve helpem iumi kasem gud samting from Bible reading bilong iumi:

• Trae for piksarem long mind bilong iu samting wea iu readim. Tingim iu nao long there. Wanem nao iu lukim, herem, and smelem? Hao nao feeling bilong olketa narawan long there?

• No duim sem samting evritaem. Tingim samfala idea hia: Read big, or luk followim taem iu lisin long wanfala audio recording. No read followim olketa chapter, bat read abaotem wanfala man or subject wea Bible storyim. Olsem example, iusim Appendix 12 long Niu World Bible, Matthew—Revelation for read abaotem Jesus. Or readim full chapter wea join witim text for datfala day. Or readim olketa Bible buk followim order wea olketa raetem.

• Trae for minim wanem iu readim. Hem gud for readim wanfala chapter evriday and for ting raonem and minim datwan, winim wei for readim staka chapter bat iu no minim wanem iu readim. Ting raonem evri samting wea happen insaed datfala reading. Iusim olketa map, and olketa cross-reference. Duim research long wanfala point wea iu no minim gud. Sapos fitim, spendem sem taem for ting raonem wanem iu readim wea iu spendem for readim.