Apesar di kristons ka sta bas di Lei di Moisés, si dus mandamentu mas garandi ku sedu, ama Deus ku ama no kumpañer, ta resumi ke ku Jeova misti di nos. (Mat 22:37-39) Es amor ka ta yardadu. I dibi di disenvolvidu. Di kal manera? Un manera importanti i atraves di leitura di Biblia kada dia. Ora ku no konsidera diferenti aspetus di personalidadi di Deus suma ki mostradu na Skritura, no na oja “bonitasku di SIÑOR”. (Sal 27:4) Suma rusultadu, no amor pa rel na kirsi i no manera di pensa na sedu suma disel. Es ta motivanu obdisi mandamentu di Deus, nkluindu mandamentu di mostra un amor ku ta buska interesi di utrus. (Jon 13:34, 35; 1 Jon 5:3) Ali tris suẑeston ku na pui pa no leitura di Biblia sedu mas agradavel:

• Usa bu imaẑinason, i nvolvi bu menti. Imaẑina kuma bu sta la. Ke ki bu pudi oja, obi o sinti? Kal ku pudi sedu sentimentu di kilis ku sta nvolvidu?

• Usa diferenti metudu. Ali alguns opsons: Lei ku vos altu, o obi i sigi na bu Biblia leitura audiu. Lei aserka di un asuntu o un personaẑen di Biblia en ves di kunsa ku lei kapitulus na orden. Pur izemplu, usa parti 4 o 16 di Ajuda pa Studa Palabra di Deus pa lei aserka di Jesus. Lei kapitulu kompletu nunde ku testu diariu tiradu nel. Lei livrus di Biblia na orden ke skribidu.

• Lei pa ntindi. Nin si bu lei so un kapitulu di Biblia kada dia, bu ntindi i medita nel, i mas minjor di ki lei manga di kapitulu so pa kubri materia. Konsidera ambienti. Analisa ditalis. Usa mapa ku referensias. Piskisa pelu menus un pontu ku bu ka ntindi. Si pusivel, ki memu tempu ku bu usa pa lei, usal pa medita.