Pa neʼ oj ri cristianos oj kʼo ta chi chuxeʼ ri Utaqanik ri Moisés, ri utaqanik che más nim ubʼanik —uloqʼoqʼexik ri Dios xuqujeʼ ri qajil qatzʼaqat— are na ri kraj ri Dios che kkibʼan ri e rajpatanelabʼ (Mt:22:37-39). Jun loqʼoqʼenik junam rukʼ wariʼ xaq ta kʼateʼ kpetik, are rajawaxik knimarisaxik. ¿Jas kbʼan che unimarisaxik? Jun utz ubʼanik are usikʼixik uwach ri Biblia ronojel qʼij. Are chiʼ kojchoman chrij ri kqasikʼij uwach, kqil ri e jeʼlalaj e ubʼantajik ri Jehová xuqujeʼ kqilo che sibʼalaj utz (Sl 27:4). Rukʼ wariʼ, kqaloqʼoqʼej más xuqujeʼ kojchoman junam rukʼ areʼ. Wariʼ kubʼan chqe che kqanimaj ri e utaqanik, xuqujeʼ ukʼutik loqʼoqʼebʼal chke nikʼaj chik xa ta rumal che kʼo kqaj (Jn 13:34, 35; 1Jn 5:3). Chqilaʼ oxibʼ bʼantajik che kojutoʼ rech kqanaʼ más kikotemal are chiʼ kqasikʼij uwach ri Biblia.

• Chqakojoʼ ri qachomanik xuqujeʼ ronojel ri qasentidos. Chqachomaj che oj kʼo chilaʼ. Chqachomaj ri tajin kkʼulmatajik, chqata ri tajin kbʼixik, chqabʼanaʼ che kqanaʼ ri ukʼokʼal. Chqachomaj ri xkinaʼ ri e winaq che e kʼo pa ri bʼantajik.

• Chqakʼexaʼ usikʼixik uwach. Kojkunik ko kqasikʼij uwach o kqata jun audio are chiʼ kqaterenej usikʼixik. Jun chi ubʼanik are usikʼixik chrij jun winaq che kʼo pa ri Biblia o kqachaʼ jun tema chrij jun bʼantajik are ta usikʼixik uwach ri Biblia pa umajibʼal kʼa pa ukʼisbʼalil. Jun kʼutbʼal, kojkunik kqakoj ri secciones 4 xuqujeʼ 16 rech ri folleto Tobʼanik rech ketaʼmax chrij ri Utzij ri Dios rech kqasikʼij chrij ri ukʼaslemal ri Jesús. Jun chi ubʼanik are usikʼixik ri capítulo che xesax wi ri texto re ri qʼij o usikʼixik kiwach ri e wuj re ri Biblia pa ri cholajil che xetzʼibʼaxik.

• Chqasikʼij rech kqachʼobʼo. Are más utz usikʼixik xa jun capítulo pa jun qʼij, che kqachʼobʼ ri kqasikʼij uwach xuqujeʼ kojchoman chrij, chuwach usikʼixik kiwach kʼi capítulos xa rumal che kqakʼis aninaq. Chojchoman chrij ri contexto,chqanikʼoj chkijujunal ri kbʼix chrij ri bʼantajik, chqakojoʼ ri mapas xuqujeʼ ri referencias marginales, xuqujeʼ chqatzukuj más kʼutunem che kchʼaw chrij jun jastaq che qas ta kqachʼobʼo. We kojkunik, chqakojoʼ junam tiempo che uchomaxik rij junam rukʼ usikʼixik uwach.