Moisesman cushca leyta mana pajtachina cashpapish Diostapish shujtajcunatapish cꞌuyanami canchij. Chai mandashcata pajtachichunmi Diosca munan (Mt 22:37-39). Diostapish shujtajcunatapish cꞌuyanatami yachana canchij. ¿Ima shina? Bibliata cada punlla leyishpa, leyishcapi cutin cutin yuyashpami Jehová cꞌuyaj, llaquij cashcata yachai tucunchij. Shinallataj ñucanchijhuan alli cashcatapish cuentata cunchij (Sl 27:4). Diosta ashtahuan cꞌuyashpami, pai yuyashca shina yuyanata yachanchij. Paipaj mandashcacunata shungumanta cazushpami shujtajcunatapish cꞌuyanchij (Jn 13:34, 35; 1Jn 5:3). Bibliata ashtahuan leyinata munangapajca quimsa alli yuyaicunata yachashun.

• Bibliata leyicushpaca alli yuyashunchij. Bibliata leyicushpaca Diosta sirvijcuna ima shina cashcata, imata uyashcata, imata mutquishcata, ima shina sintirishcatapish yuyashpa ñucanchijpish chaipi cashcata yuyashunchij.

• Bibliata ima shina leyinata mashcashunchij. Bibliataca uyarijta parlashpami leyina canchij o Bibliamanta leyishca grabashcacunatami uyai tucunchij. Shinallataj callarimanta tucuricama leyinapaj randica Diosta sirvij huaquin runacunamanta o shuj temata agllashpami Bibliataca leyi tucunchij. Por ejemplo, secciones 4 y 16 Guía para el estudio de la Palabra de Dios nishcapimi Jesusmanta ashtahuan yachai tucunchij. Texto diariomanta shuj versota intindingapajca tucui capitulotami leyi tucunchij. Mana cashpaca ima huatapi Bibliapaj librocunata escribishcata ricushpami leyi tucunchij.

• Bibliataca intindingapaj leyishunchij. Achca capitulocunata utca utca leyinapaj randica shuj capitulota alli intindishpa leyinami alli canga. Ñaupaman imata yachachishcapi qꞌuipaman imata yachachishcapipish yuyana canchij. Tucuitami alli ricuna canchij. Traducción del Nuevo Mundo Bibliapica mapacunata, referencias marginales nishcata ricushpami ashtahuan yachai tucunchij. Imata yachachisha nishcata intindingacama mashcashunchij. Mashna tiempo leyishpapish chai shinallataj alli yuyangapaj tiempota surcushunchij.