Noatu kare te au Kerititiano e aru ana i te Ture a Mose, riro ra te nga ture maata rava atu—ko te anoano i te Atua e te aroa i te tangata tupu—ei akaari mai kia tatou i ta Iehova e umuumu maira mei ia tatou. (Mata. 22:37-39) Kare tatou i anauia mai e teia tu, ka akatupu tatou i teia. Akapeea ra? Tetai ravenga meitaki na te tatau putuputuanga i te Pipiria. Me akamanako tatou i te au tu tuke ke o te Atua i roto i te Pipiria, ka kite tatou “i te meitaki o Iehova.” (Sala. 27:4) Ka ketaketa katoa to tatou inangaro nona e ka rave tatou i tana e inangaro maira ia tatou. Ka akakeu teia ia tatou kia aru i te au akauenga a Iehova kia akaari i te aroa no etai ke. (Ioa. 13:34, 35; 1 Ioa. 5:3) Teia e toru ravenga ei tauturu kia mataora taau tatau Pipiria:

• Taangaanga i toou manako. Akamanako ana e tei reira koe. Eaa te au mea taau ka kite, ka akarongo e ka ongi? Ia koe e akamanako ra, eaa te tu o te aronga i reira?

• Taui i te ravenga. Teia tetai au akaraanga: Tatau maata i te reira, me kore aru e te akarongo i te rekotianga o te tatau Pipiria. Taui i te tu o taau tatau Pipiria, penei tatau i te tua o tetai tangata i roto i te Pipiria me kore tetai tumu manako. Ei akaraanga, taangaanga i te Appendix A7 me kore B12 i roto i te New World Translation of the Holy Scriptures me tatau i te tua o Iesu. Tatau i te pene pouroa mei roto mai i te tia. Aru i te papaanga o te au puka Pipiria me tatau koe.

• Tatau ma te akamanako. Noatu ka tatau koe e tai pene i te rā, meitaki atu me akamanako e me mārama koe i te tatau ua kia tae ki te openga. Akamanako i taau i tatau. Akara meitaki eaa te apiianga. Taangaanga i te au māpu e te au irava tauturu. Kimikimi no runga i tetai manako kare koe i mārama. Me ka tau, akanoo kia aiteite te tuatau me tatau e me akamanako.