Tsy ambanini-Lalànani-Mosesy sasy ty Kristiana. Fe mbo voafehy amy didy roe bevata marè ao rey avao ty raha takini-Jehovah amintsika. Tsy ino zay fa ty hoe ho tea a Ndranahary noho ho tea nama. (Mt 22:37-39) Tsy avy le mana ani-fitiava zay tsika laha vo ateraky. Mila ambolè raha io. Amy fomba akory? Tena ilà ohatsy ty mamaky Baiboly sanandro. Miresaky ty toetsy sankarazany mampiavaky a Ndranahary ty Soratsy Masy. Lafa mandiniky ani-raha rey tsika, le hahita “ty hasoani-Jehovah.” (Sl 27:4) Mitombo amy zay ty fitiavantsika azy ka miha mitovy hevitsy aminy tsika. Farany voatosiky hanoriky ty didi-Ndranahary tsika, anatini-zay ty didy mba hana fitiava feno fahafoizam-bata ho ahi-ty hafa. (Jn 13:34, 35; 1Jn 5:3) Retoa misy soso-kevitsy telo manampy antsika hahazo tavy ty famakiantsika Baiboly:

• Diniho ze mety ho niseho, le ataovo hitanao noho renao. Eritsereto hoe teo mihintsy iha. Ino ty raha hitanao? Ino ty feo na fofon-draha renao? Ino iaby ty mety ho nitsapani-olo ao reo?

• Ovaovao ty famakianao. Retoa misy hevitsy sisany: Mamaky marè, na mijanjy Baiboly nalà feo sady manaraky ty famakia azy. Tsy voatery hamaky toko mifanesisesy koa iha, fa afaky mifily tantaran’olo raiky na foto-kevitsy raiky manoka. Azonao ampiasà, ohatsy, ty Fizarà 4 noho 16 amy Fianaran-draha amy Safà-Ndranahary Ao laha hamaky ty tantarani-Jesosy. Azo atao koa ty mamaky ty toko iaby nangalà ani-andinin-teny amy andro iny, na vakio arakaraky ty fotoa nanorata azy boky amy Baiboly ao rey.

• Miezaha hahazo ze vakinao. Aleo mamaky toko raiky sanandro sady mahazo ty dikany noho mametsivetsy ani-zay, tozay manea mamaky toko maro avao. Henteo hoe aia noho amy fotoa manao akory ro nanorata azy. Diniho ty tsipiriany. Mampiasà sarintany noho fanondroa andininy hafa. Anovo fikaroha ty hevitsy tsy azonao raiky fara fahakeliny. Ataovo mitovitovy amy fotoa namakianao iny ty fotoa atokanao hametsevetsea, laha azo atao.