Sunga byekala shi Mwiya wa Moyise taukii dingi mu kitungo bwa bena Kidishitu, kufula Efile Mukulu na muntu netu nkwikale miiya ibidi ikile bukata ayilesha mu kikoso abitutekye Yehowa. (Mat 22:37-39) Anka t’atutandjikaa na kyakya kifulo nya. Abitungu kwitatshisha bwa kwikilesha. Mu kipaso kinyi? Mushindo umune ukile bukata wa kwibikita nyi nkubadika Bible efuku dyoso. P’atubadika mishindo ilekene ya bumuntu bwa Yehowa muyile byabidi mu Bifundwe, atukyebe kubandjila “bi buwa bwa Yehowa.” (Mis 27:4) Su twakita byabya, atukyebe kutamisha kifulo kyetu bwa Yehowa na kunangushena mu kipaso kimune naye. Bino abitutakula mu kukokyela miiya y’Efile Mukulu, pamune na mwiya wa kwisumina ingi miloo bwa kulesha kifulo kwi bangi. (Yo 13:34, 35; 1Yo 5:3) Tala mishindo isatu pabitale bya kupeta muloo mu kubadika kwa Bible:

• Fubisha mweneno a kumona myanda i kumpala akupu ofubishe ngyelelo oobe a binangu. Banda kupwandjikisha shi we panka. We kumona, na kupusha kinyi? We kupusha naminyi bwa baba babesambila?

• Shintuula byubishi byobe. Tala imo ya ku mishindo yodya kwibikita: Badika n’eyi adipushika sunga kulonda pamune kubadika kwabadi bakobole. Badika pabitale bantu sunga myanda kapanda pamutwe wa kubadika ma shapitre mu mulongo. Bu kileshesho, we kubadika kipindji 4 na 16 kya Mukanda aukwasha bwa kulonga Eyi dy’Efile Mukulu bwa kulonga pabitale Yesu. We kubadika chapitre mushima mwabadi bate kifundwe kya kwifuku. We kubadika Bible muyile mafuku ababadi bafunde mikanda.

• Badika bwa kupusha. Kubadika sunga shapitre umune efuku dyoso bwa kupusha na kunangushena nkukile buwa pa mutwe wa kubadika ma shapitre ebungi penda bwa kupudisha Bible. Tala kibabadi bafundjile wawa mwanda. Talula tu myanda tupelatupela twiutale. Fubisha ma carte na ma références marginales. Kimbuula ku nfudilo myanda yoshii mupushe. Su kwi mushindo, kisha nsaa i kufika pamune na yokisha mu kubadika bwa kunangushena.