Hii fa dee Keesitu sëmbë an ta hoi hii dee wëti di Gadu bi da Mosesi, ma dee tu möön gaan wëti di ta taki taa u musu lobi Gadu ku woto sëmbë ta lei u andi Jehovah kë fuu du (Mt 22:37-39). De an ta pai u ku di lobi aki. U musu mbei möiti u ko abi ën. Unfa u sa ko abi ën? Wan fasi fa u sa ko abi ën, hën da te u ta lesi Bëibel hiniwan daka. Te u ta pakisei u dee fasi di Gadu abi dee sikifi a di Bëibel, nöö woo si taa „Jehovah ta du bunu soni” (Ps 27:4). Di soni dë o mbei u ko möön lobi ën, söseei woo ko ta pakisei kumafa a ta pakisei. Di soni aki ta da u taanga fuu ta hoi dee wëti fëën, te kisi di wëti di ta lei taa u musu lobi wotowan (Jo 13:34, 35; 1Jo 5:3). Luku dii soni aki di u sa du di sa mbei u ta möön piizii te u ta lesi di Bëibel:

• Pakisei fa soni bi dë, nöö si iseei a di woto. Pakisei taa i sai dë. Andi i ta si? Andi i ta jei? Andi i ta sumëë? Unfa dee sëmbë dee dë a di woto bi sa ta fii?

• Tooka di fasi fa i ta lesi. Luku wantu soni di i sa du: Lesi ku wan taanga töngö, nasö ee i ta haika di audio, nöö ta luku a di Bëibel fii tu. Lesi wan woto u wan sëmbë u Bëibel, nasö u wan soni ka fii ta lesi dee kapitë baka-na-baka. Kandë i sa lesi dee pisi dee ta taki u di libi u Jesosi dee sikifi a woto 4 nasö a woto 16 u di piki buku „Studeri Gadu wortu moro fini”. Lesi hii di kapitë ka de puu di daka wöutu. Lesi dee Bëibel buku kumafa de sikifi baka-na-baka.

• Lesi fii sa fusutan andi i ta lesi. Te i ta lesi wan kapitë hiniwan daka fii fusutëën, söseei te i ta pakisei fundu fëën, nöö a möön bunu ka fii lesi sömëni kapitë faa dë taa i lesi di Bëibel. Pakisei naasë di woto ta pasa. Pakisei dee pikipiki soni u di woto. Wooko ku dee kaita, ku woto pikipiki soni u öndösuku soni. Öndösuku aluwasi wan soni di ja kaba fusutan. Ee a sa, nöö tei di wan seei ten di i bi lesi fii pakisei fundu u di woto.