Aladi Kresten no abi fu hori densrefi na a Wet di Gado ben gi Moses, toku den tu moro bigi komando fu a Wet dati e sori ete san Yehovah e aksi fu wi. Den komando disi e taki dati wi musu lobi Gado nanga tra sma (Mt 22:37-39). A lobi disi a no wan sani di e kon fu ensrefi. Wi musu leri fu kon abi en. Fa wi kan du dati? Wan prenspari fasi, na fu leisi Bijbel ibri dei. Te wi e poti prakseri na den difrenti fasi fu Gado, soleki fa Bijbel e sori dati, dan wi e si taki „Yehovah e du bun” (Ps 27:4). Na so a lobi di wi abi gi en o gro èn wi o denki moro leki en. Disi o meki taki wi o wani gi yesi na den komando fu Gado, sosrefi na a komando di e taki dati wi musu sori lobi gi trawan sondro fu suku wi eigi bun (Yoh 13:34, 35; 1Yh 5:3). Luku dri sani di yu kan du fu leisi Bijbel nanga moro prisiri:

• Pruberi fu si a tori na yu fesi. Prakseri taki yu de drape. San yu ben o si, san yu ben o yere, èn san yu ben o smeri? Fa den sma na ini a tori ben e firi kande?

• Pruberi fu kenki a fasi fa yu e leisi Bijbel. Luku wan tu sani di yu kan du: Leisi nanga wan tranga sten. Noso yu kan leisi na ini yu Bijbel aladi yu e arki a pisi dati tapu yu tablet noso telefon. Leisi den pisi na ini Bijbel di e taki fu wan spesrutu sma noso fu wan spesrutu tori, na presi taki yu e leisi a wán kapitel baka a trawan. Fu eksempre, gebroiki „Moro sani” 23 na ini a Bijbel​—Nyun-Grontapuvertaling noso sgd Pisi 16 fu leisi sani di abi fu du nanga Yesus. Leisi a heri kapitel pe den puru a deitekst. Leisi den Bijbel buku a wán baka a trawan soleki fa den ben skrifi.

• Pruberi fu frustan san yu e leisi. Leisi awinsi wán kapitel ibri dei na so wan fasi taki yu e frustan san skrifi èn denki dipi fu san yu leisi. Disi moro bun leki te yu e leisi wan lo kapitel baka makandra soso fu man klari den kapitel. Prakseri san ben de a situwâsi. Luku den finifini sani fu a tori. Gebroiki den karta nanga den verwijstekst. Ondrosuku awinsi wán sani di yu no e frustan. Efu a kan, teki a srefi ten di yu e leisi, fu denki fu den sani di yu leisi. Fu eksempre, efu yu teki 15 miniti fu leisi, dan a bun fu teki 15 miniti tu denki fu den sani di yu leisi.