Nanobe umtsetfo waMosi ungawaphoceleli emaKhristu, kodvwa imitsetfo yawo lemibili, lekutsandza Jehova kanye namakhelwane wetfu, iphetse ingcikitsi yaloko Jehova lafuna sikwente. (Mat 22:37-39) Lutsandvo lolunjalo alutentakaleli. Yini lengasenta sibatsandze? Indlela lebalulekile kufundza liBhayibheli malanga onkhe. Nasicabangisisa ngebuntfu baNkulunkulu lobehlukahlukene lobusemiBhalweni, sisuke ‘sibukisisa buhle baJehova.’ (Hla 27:4) Umphumela uba kutsi lutsandvo lwetfu ngaJehova luyakhula, futsi sibese sicabangisa kwakhe. Loku kusenta silalele imitsetfo yaNkulunkulu lefaka ekhatsi kutsandza labanye. (Joh 13:34, 35; 1Jh 5:3) Nati tindlela letintsatfu letingenta kufundza liBhayibheli kujabulise:

• Kubone ngeliso lengcondvo lokwentekako futsi ukwente kuphile. Tibone ulapho. Yini lobewutayibona, uyive nobe uyihogele? Kungenteka bativa njani labanye labalapho?

• Sebentisa tindlela letehlukahlukene. Naku longakwenta: Fundza ngalokuvakalako, nobe ulandzele njengoba ulalela lokutsetjuliwe. Fundza ngemuntfu lokukhulunywa ngaye eBhayibhelini nobe ngendzaba letsite kunekutsi ufundze tehluko ngekulandzelana kwato. Ngekwesibonelo, sebentisa Sandzisanchazo 11 lesiku-Lihumusho Lemhlaba Lomusha LemiBhalo YemaKhristu YesiGriki kuze ufundze ngaJesu. Sifundze sonkhe sehluko umBhalo welusuku lotsetfwe kuso. Fundza tincwadzi teliBhayibheli ngekulandzelana kweminyaka yekubhalwa kwato.

• Yetama kukucondza loko lokufundzako. Kufundza sehluko sinye ngelilanga usicondze kahle futsi uzindle ngaso kuncono kakhulu kunekufundza tehluko letinyenti ngobe nje ufuna kusheshe ucedze. Cabanga ngalobekwenteka kuleyondzaba. Hlatiya imininingwane yayo. Sebentisa emabalave netikhombo letiseBhayibhelini. Cwaninga ngeliphuzu linye longalicondzi. Nakungenteka, tsatsa sikhatsi lesilingana nalosisebentisile nawufundza kute ucabangisise ngalokufundzile.