Maski ema kristaun la moris tuir ona Moisés nia Ukun-Fuan, maibé Jeová hakarak ita atu halo tuir nafatin mandamentu rua neʼebé boot liu husi Moisés nia Ukun-Fuan, neʼe mak hadomi Maromak no ita-nia maluk. (Mt 22:37-39) Domin neʼe ita moris mai laʼós iha ona, maibé tenkesér haburas. Oinsá? Dalan importante ida mak hodi lee Bíblia loron-loron. Bainhira ita aprende kona-ba Maromak nia hahalok furak oioin husi Bíblia, ita bele haree duni “Jeová nia laran-diʼak”. (Sal 27:4) Rezultadu mak, ita-nia domin ba nia sei sai boot liu no ita-nia hanoin mós sei sai besik liután hanesan ninian. Neʼe bele book ita atu halo tuir Maromak nia mandamentu sira, inklui mós mandamentu atu hatudu domin ba ema seluk. (Jo 13:34, 35; 1Jo 5:3) Tuirmai ita haree sujestaun tolu oinsá ita bele haburas liután hakarak atu lee Bíblia:

• Uza Ita-nia imajinasaun. Imajina katak Ita moris daudaun iha tempu neʼebá. Ita bele haree, rona, no horon buat saida deʼit? Karik ema sira iha tempu neʼebá sente oinsá?

• Uza dalan oioin. Opsaun balu mak: Lee ho lian makaʼas ka akompaña lee tuir gravasaun. Lee kona-ba ema ka tópiku ruma husi Bíblia duké lee tuir kapítulu ida-idak. Porezemplu, uza parte 4 ka 16 husi livru Informasaun neʼebé ajuda ita atu komprende Bíblia hodi lee kona-ba Jesus. Iha loron ida-idak, lee kapítulu tomak husi versíkulu neʼebé uza ba Buka-hatene Didiʼak Eskritura Loron-loron nian. Lee Bíblia tuir tinan ida-idak neʼebé ema hakerek eskritura sira.

• Lee atu buka-hatene. Iha loron ida-idak, maski lee deʼit kapítulu ida hodi buka-hatene no medita kona-ba buat neʼebé Ita lee, diʼak liu fali lee liu deʼit kapítulu barak. Buka-hatene saida mak akontese iha tempu neʼebá. Analiza informasaun ida-idak. Haree mapa no referénsia sira. Halo riset kona-ba buat ida neʼebé Ita seidauk hatene. Se bele, uza tempu atu medita hanesan oras neʼebé Ita gasta hodi lee.