Tsy ambane ty Lalà i Mosesy sasa ty Kristiana. Faie mamintigne soa ze raha také i Jehovah amantikagne o lily roe lahibey reo, le ty hatea an’Andrianagnahare naho ty hatea namagne. (Mt 22:37-39) Tsy mandeha ho aze avao o hatea rehoe fa tsy maintsy ambolegne. Akore ty hanagnagne aze? Voaloha’e, mamaky Baiboly isan’andro. Hahatrea “ty hasoa i Jehovah” tikagne naho fa mandineke ty toetse’e sambe hafa rehafegne ao. (Sl 27:4) Hitombo ka ty hateantikagne aze sady hitovy amy ty aze ty fomba fiheventikagne. Manjare te hankatò ty lili’e ka tikagne. Agnisa izay i tihoey, mila maneho hatea feno fahafoezan-tegna amy ty hafa tikagne. (Jn 13:34, 35; 1Jn 5:3) Intoagne misy fomba telo, hagnampe azo ho tea mamaky Baiboly:

• Alao sare an-tsaigne ze vakie’o. Eretsereto hoe magnatreke eo rehe. Ino ty trea’o, ty rei’o, naho ty fofogne tsapa’o? Ino ty va’e ho tsapa ze ndaty rehafegne ao?

• Ovaovao ty fomba amakia’o aze. Intoa misy soso-kevetse: Mamaky mafe i andine’e rey, mitsanogne ze nalaem-peo sady magnorike amy Baiboly ao. Mamaky tantara o ndaty raike, faie tsy asese i tokoy. Ampiasao ohatse ty fizaràgne 4 ndra 16 amy ty Tari-dalagne Hoahy ze Mianatse ty Saontsin’Andrianagnahare naho fa mamaky ty tantara i Jesosy rehe. Ndra vakio iaby ty toko amy ty andine’e nangalagne ty teny hodinehegne isan’andro. Azo’o asese arake ty fotoagne nanoratagne aze ka o boke amy Baiboly ao reo.

• Anò ty hahazoa’o ze vakie’o. Ndraleo’e mamaky toko raike isan’andro faie azo sady nisaintsaignegne soa toy izay mamaky toko maro mba hamitagne aze avao. Dineho ty rehake magnodidigne. Fakafakao ty pitsopitso’e. Ampiasao i saren-taney naho ty fanondroagne andine’e hafa. Naho misy hevetse tsy mazava, farafaharati’e karoho ty raike ama’e. Naho mete, le ampitovizo ty fotoagne amakia’o naho ty fotoagne isaintsaigna’o.