Karaida mam Ikisila Luka Musa ikamunitos Ikristayon lolo, konye aicorakineta aarei nuepolok​—amina Edeke keda amina eidunyet, itacaunitos nuekoto Yawe oni aswam. (Mat 22:37-39) Mam amina na erai naurunet. Ekoto oni aitopol. Epone bo ani epedoror? Epone losodit, nges asiomenen Ebaibuli. Kisisiomenen oni nuikamunitos iponesio luka Edeke kotoma Obaibuli, ipedori oni aanyun “ajokis naka EJAKAIT.” (Sab 27:4) Kiswama oni ngun, epoloor aminawok naka Edeke kasodete oni aomoom noi nuikamunitos ngesi. Isinyikokini na oni airic aicoreta nuka Edeke aimoriarit aicoretait na amina luce. (Yok 13:34, 35; 1Yok 5:3) Koany akiro auni nuepedorete aingarakin ijo alelakin aisisiomenen Ebaibuli:

• Kipikak etaukon aomoom. Komoom ber ijo bala ijai jo aiboisit ngin. Anyoika bo nuiseseni ijo, nuipupi ijo, ka nuinguunit ijo? Anyoika bo nueutasi atakanikin itunga luinerai kanen?

• Kijulanak aisisiakon. Ipedori ijo aswam nuta: Kosiom keda eporoto loepupo, arai bo kopup ido kotupak esiomio. Kosiom nuikamunitos idisitunganan koBaibuli arai bo koseu akirot adiopet itia amearit aisiom isulai kere. Kwape aanyunet, kitosom akiro nuejaasi Appendix A7 arai bo B12 nuejaas Obaibuli loka New World Translation of the Holy Scriptures kanu aisiom nuikamunitos Yesu. Kosiom esula kere loelemunitere edeiletekis. Kosiom iitabon luka Ebaibuli katupanakinetakec.

• Kosiom ka amisiikin. Asiomenen ediopesula kosodi amisiikin, itelekaarit asiomenen isulai luipu komam imisiikinit. Irereo ejautene loka akiro nuiwuta ijo asiom. Kongic kaidules akiro nuisisiai ijo. Kitosom amaapun keda ikokoron nuiyatakinitai. Komoo akiro nuiyatakinitai arai mam ijo imisiikinit nuiwuta ijo aisiom. Koyangaik apak aomoom nuisiomi ijo.