Er Mbakristu ve kera lu sha ikyev i Tindi u Mose la ga nahan kpa, tindi la ngu a atindi a tamen ahar ker, a a ze hemen u tesen kwagh u a Aôndo a soo hen a vese yô, ka tindi u Aôndo man mbawanndor a vese ve doo se ishima je la. (Mt 22:37-39) Se mba ye dyako sha imba dooshima ne ga. Saa se nôngo kwagh ve se lu a dooshima ne ye. Se er kwagh ne nena? Gbenda môm u hange hange u eren kwagh ne yô, ka u ôron Bibilo hanma iyange cii. Ka sea timen sha ieren i Aôndo i i lu ker atô kposo kposo, er i pase ken Ruamabera nahan yô, se nenge “mkomashe u TER.” (Ps 27:4) Kwagh ne ka a na yô, dooshima u se lu a mi sha a na la a seer shi se hemba henen kwagh er un nahan. Maa kwagh ne a mgbegha se u kuran atindi a Aôndo, kua tindi u a kaa ér se tesen mbagenev dooshima a iyol tangen shio la. (Yoh 13:34, 35; 1Yoh 5:3) Nenge ase mbamhen utar mba i dugh a mi, sha er a hemba doon se u ôron Bibilo yô:

• Gbidye kwar shi nenge a kwagh u u lu ôron la ken ishima you. Tôô wer u ngu her iyol you. Ka nyi u nenge a mi, shi u ungwa iov i nyi, shi ka ihyuma i nyi u ongo? Alaghga ka nyi i lu mnenge u ior mba u lu ôron kwagh ve laa?

• Gema gbenda u u ôron Bibilo la. Nenge ase igbenda igen ne: Ôron Bibilo i duen sha, shin nengen ken Bibilo you, shighe u u we tser na, u lu ungwan yô. De ôron mtom ma Bibilo sha adondo adondo tsô ga, kpa tsua ma or u ken Bibilo shin ma itinekwagh jighilii ôr. Ikyav i tesen yô, er tom a Vegher u sha 4 shin Vegher u sha 16, u Takerada u Wasen We u Henen Mkaanem ma Aôndo la, sha u ôron kwagh u Yesu. Shin u fatyô u ôron ityough ki i zough a ivur i sha hanma iyange ker la jimin cii. Gayô ôr ityakerada i Bibilo er yange i nger i sha adondo adondo la nahan.

• Ôron Bibilo er u kav yô. Aluer u ôr ityough i môm tseegh hanma iyange u kav shi u gbidye kwar sha mi yô, a hemba lun we a inja a u we ôron mtom kpishi wer u nôngo u ôr u bee tseegh tsô la. Time sha akaa a a kase kwagh u u lu ôron la. Tôv sha kwagh u u lu ôron la vighe vighe. Time sha umaape man avur a Bibilo a shin kpe, a a gbe a zough sha agenegh la. A hemba kpa, tôv sha kwagh môm u u kav un tsembelee ga yô. A gba sha mi yô, shighe u u tee u gbidyen kwagh sha kwagh u u er ken Bibilo la, a lu kwaghmôm a shighe u u tee u ôron la.