Kaanga mbele Akristo waya bu l’ɛse k’Ɛlɛmbɛ wa Mɔsɛ, ɛlɛmbɛ ehende woleki weke wa lɛkɔ, mbuta ate nanga Nzambi ndo wonyaso onto, mɛnyaka lo tshena pe kɛnɛ katɔlɔmba Jehowa. (Mat 22:37-39) Ngandji kɛsɔ haye le so mbala kakɔ ɔtɔi. Sho pombaka mbidja welo dia monga la tɔ. Lo ngande? Yoho mɔ y’ohomba ele lo tshimbo ya wadielo wa Bible wa lushi la lushi. Etena kasɛdingolaso toho totshikitanyi ta lonto laki Nzambi oko wadiɛnya Afundelo, tayɛna “dimɛna dia Jehowa.” (Os 27:4) Etombelo wayonga la dui sɔ ele, ngandji kaso otsha le nde kayohama ndo ekanelo kaso ka yimba kayonga oko kande. Dui sɔ totshutshuyaka dia nkitanyiya wadjango wa Nzambi, mbidja ndo didjango dia monga la ngandji ka ndjahombia otsha le anto akina. (Jni 13:34, 35; 1Jn 5:3) Alako asato wayotokimanyiya dia sho ndeka ngɛnangɛna wadielo wa Bible vɔ anɛ:

• Kamba l’ekanelo kayɛ, ndo l’awoki ayɛ. Ɔsa dia wɛ ekɔ lɛkɔ. Kakɔna kotoyɛna, kotoyoka ndo solo kakɔna kotoyoka? Ngande wotoyaoka anto wele lɛkɔ?

• Tshikitanya yoho yayɛ ya mbadia. Toho tɔmɔtshi tɔ tɔnɛ: Adia la dui dia wolo, kana tayelaka kaamɛ awui wakadjama l’eshinga. Adia dikambo di’onto ɔmɔtshi latɛkɛtama lo Bible kana adia dui dimɔ shikaa lo dihole dia mbadia totshapita l’ɔnɔngɔ. Ɛnyɛlɔ, kamba la Apandisɛ A7 kana B12 lo Bible—Ekadimwelo k’andja w’oyoyo dia mbadia awui wendana la Yeso. Adia tshapita y’otondo y’oma lɛnɛ ɔsami divɛsa dia lushi. Adia abuku wa lo Bible l’ɔnɔngɔ lo ndjela woho wakawafundama.

• Adia dia nshihodia. Wadielo wa tshapita kaanga ɔtɔi lo lushi dia nshihodia ndo nkana yimba, ndeka wadielo wa totshapita efula paka dia nshidiya la mbadia Bible. Dja yimba lo kɛnɛ katɛkɛtama laawɔ. Sɛdingola awui watɛkɛtama lɔkɔ. Kamba la kartɛ ndo ɛrɛferansɛ wa l’ehembo. Sala eyangelo dia nshihodia kaanga dui ɔtɔi diahayashihodia. Naka kokaka, etsha lofulo la wenya akɔ waamɛ wa wadielo dia nkana yimba.