Chinanga kuti Akhristu alondo Dangu laku Mozesi cha, kweni marangu ngaŵi ngakulungakulu ngakukwaskana ndi kwanja Yehova kweniso anyidu, ngalongo mbwenu vo Yehova wakhumba kuti tichitengi. (Mate. 22:37-39) Palivi yo wachita kuwa nachu chanju ichi. Kumbi tingachita wuli kuti tiyambi kuja ndi chanju chenichi? Kuŵerenga Bayibolu zuŵa lelosi ndiyu nthowa yamampha ukongwa. Kuŵanaŵaniya mijalidu yakupambanapambana yaku Chiuta yo yizumbulika m’Malemba, kutitiwovya kuti tiwonengi “umampha waku Yehova.” (Sumu 27:4) Pavuli paki, titamba kumuyanja ukongwa ndipu maŵanaŵanu ngidu ngatamba kukoliyana ukongwa ndi ngaki. Venivi vititichitisa kuti tisungengi marangu ngaku Chiuta, ngo ngasazgapu dangu lakuti tiyanjengi anyidu ndi mtima wosi. (Yoha. 13:34, 35; 1 Yoha. 5:3) Wonani vinthu vitatu vo tingachita kuti tikondwengi ndi kuŵerenga Bayibolu:

• Mujiyeruzgiyengi kuti muwona vo vichitika. Yeruzgiyani kuti namwi mwengaku pa nyengu iyi. Kumbi ndi vinthu wuli vo mwatingi muwonengi ndipuso kuvwa? Kumbi mwatingi muvwengi kunukhira kwa vinthu wuli? Nanga ŵanthu wo akambika munkhani yo avwanga wuli?

• Mugwiriskiyengi ntchitu nthowa zakupambanapambana. Nthowa zinyaki ndi izi: Muŵerengengi mwakukweza, pamwenga mulondongi m’Bayibolu linu asani mugwiriskiya ntchitu Bayibolu lakuvwisiya. Muwerengengi vakukwaskana ndi munthu munyaki wa m’Bayibolu yo mwakhumba, pamwenga nkhani yinyaki m’malu mwakuŵerenganga waka mwakulondo machaputala. Mwakuyeruzgiyapu, mungagwiriskiya ntchitu Kabuku Kakusambiriya Mazu Ngaku Chiuta, chigaŵa 4 pamwenga chigaŵa 16, kuti muŵerengi vakukwaskana ndi Yesu. Muŵerengengi chaputala chosi po patuwa lemba la zuŵa lenilo. Muŵerengengi mabuku nga m’Bayibolu mwakukoliyana ndi nyengu yo ngakulembeke.

• Muŵerengengi munthowa yakuti muvwisengi. Kuŵerenga chaputala chimoza zuŵa lelosi ndi kuchivwisa kweniso kuŵanaŵaniyapu, nkhwamampha ukongwa kuluska kuŵerenga waka machaputala nganandi kuti mumalizi. Muŵanaŵaniyengi malu ngo nkhani yo yinguchitikiya. Muvwisengi mo nkhani yo yingwende. Mugwiriskiyengi ntchitu mapu kweniso malifalensi ngo ngasanirika pakati pa Bayibolu. Muyesesengi kufufuza chinanga yingaŵa fundu yimoza yo mwaleka kuyivwisa. Asani nkhwamachitika, nyengu yo mungamaliya pakuŵanaŵaniya yiyananengi waka ndi nyengu yo mwaŵerenge.