JA SAKʼANIL JA YAʼTIJUM DYOS

Ja jastal oj bʼobʼ jyajtaytik ja Dyos sok ja jmojtiki

STSANJEL BʼA

Ama ja yaʼtijumik Dyos mi wala tʼenjitik bʼa tʼilan oj jkʼuʼuktik ja Ley bʼa Moisés, pe ja Dyos wani skʼana oj sjeʼ ja yaʼtijumik ja chabʼ mandar mas tʼilani; syajtajel ja Dyos sok ja jmojtiki (Mt 22:37-39). Ja tikʼe yajtanel it mi jachʼ lom wa xkʼiʼi, tʼilani ay jas oj jkʼuluktik. ¿Jastal? Jun modo jani skʼumajel ja Biblia kʼakʼu kʼakʼu. Yajni wa xpensaraʼantik ja jas wa xkʼumantiki, wa xkʼot kiltik jel tsamal sok jel lek ja smodo ja Jyoba (Sl 27:4). Yuja jaw, wa xkʼot jyajtaytik mas sok wa xnebʼatik ja modo spensar ja yeʼn. Ja jaw wa sjutbʼinotik bʼa oj jkʼuʼuktik ja smandariki, chomajkil sjejel wa xyajtaytik ja tuk sok mi jas smajlajel (Jn 13:34, 35; 1Jn 5:3). La kiltik oxe modo bʼa jastal oj katik el slekilal ja skʼumajel ja Biblia.

La jpensaraʼuktik sok la kabʼtik lajansok teytik tiw. La jpensaraʼuktik lajansok teytik tiw. La jchʼik jbʼajtik ja bʼa jas wan ekʼeli, la jkʼeltik sok la jmaklaytik. La jpensaraʼuktik ja jastal ay xyabʼye ja matik wan stajel tiʼal ja Biblia.
La jpaklaytik bʼa tuktukil modo. Oj bʼobʼ jkʼumuktik tsats ma oj jmaklaytik jun grabasyon malan wantik snochjel bʼa Biblia. Bʼa pilan modo ja skʼumajel bʼa june wan stajel tiʼal ja Biblia ma oj bʼobʼ jpaklaytik jun yolomajel ama mi xkʼumantik ja Biblia man skʼeʼulabʼil sok man xchʼakulabʼil. Jun sjejel, oj bʼobʼ katik makunuk ja xetʼan 4 sok 16 ja bʼa poyeto Koltajel bʼa spaklajel ja Yabʼal ja Dyosi bʼa skʼumajel sbʼaja sakʼanil ja Jesús. Cha pilan modo jani skʼumajel ja kapitulo bʼa elel ja teksto bʼa kʼakʼu ma skʼumajel ja libroʼik bʼa Biblia ja bʼa jastalni tsʼijbʼaxijani.
La kabʼtik stojol ja jas wa xkʼumantiki. Mas lek ja ta jkʼumantik jun kapitulo ja kʼakʼu, pe bʼa wa xpensaraʼantik lek sok wa xkabʼtik lek stojolil yuja oj jkʼumuktik jitsan kapitulo bʼa wegoxta oj chʼakotik. La jpensaraʼuktik sbʼaja jas yalatakoni. La jpaklaytikon ja jastik ti chʼikani. La katik makunuk ja mapaʼik sok ja tekstoʼik wa xjekwani bʼa tuk tekstoʼik. Sok la jletik bʼa tuk juʼunik ta ay jas mi xkabʼtik stojol. Ta wa xbʼobʼi, ja janekʼ tyempo wa xyiʼaj kujtik skʼumajel jach la cha jpensaraʼuktik.