Hambileswi Vakreste va nga ha riki ehansi ka Nawu wa Muxe, kambe swileriso swa wona swimbirhi leswikulu leswi nge—rhandza Xikwembu ni warikwerhu—swi kombisa leswi Yehovha a swi languteleke eka hina. (Mt 22:37-39) Rirhandzu ro tano a hi velekiwi hi ri na rona. Ri fanele ri hlakuleriwa. Njhani? Ndlela yin’wana leyi hi nga ri hlakulelaka ha yona i ku hlaya Bibele siku ni siku. Loko hi kambisisa timfanelo ta Xikwembu hilaha ti hlamuseriweke ha kona eBibeleni, hi ta vona “ku tsakisa ka Yehovha.” (Ps 27:4) Loko hi endla tano, hi ta ya hi n’wi rhandza swinene naswona hi ta hanya hi ndlela leyi n’wi tsakisaka. Leswi swi ta hi susumetela ku hlayisa swileriso swa Xikwembu, ku katsa ni lexi nge hi rhandza van’wana swi suka embilwini. (Yh 13:34, 35; 1Yh 5:3) Xiya swiringanyeto leswi landzelaka leswi nga ku pfunaka u tsakela ku hlaya Bibele:

• Vona leswi u swi hlayaka hi mahlo ya mianakanyo. Tivone u ri kwalaho. U vona yini, u twa yini naswona ku nun’hwela yini? Vanhu lava ku vulavuriwaka ha vona va titwa njhani?

• Ringeta tindlela to hambanahambana. Hi leswi swiringanyeto swin’wana: Hlayela ehenhla, kumbe u fambisana ni rungula leri rhekhodiweke. Hlaya hi munhu wo karhi wa le Bibeleni kumbe hi mhaka yo karhi ematshan’weni yo hlaya tindzima hi ku landzelelana ka tona. Hi xikombiso, tirhisa Appendix A7 kumbe B12 eka Vuhundzuluxeri Bya Misava Leyintshwa Bya Matsalwa Yo Kwetsima bya Xinghezi leswaku u dyondza hi Yesu. Hlaya ndzima hinkwayo leyi ndzimana ya siku yi sekeriweke eka yona. Hlaya tibuku ta Bibele hi ku ya hi nxaxamelo wa ndlela leyi ti tsariweke ha yona.

• Hlayela ku twisisa. Ku hlaya ndzima yin’we hi siku u tlhela u anakanyisisa ha yona, i swa nkoka swinene ku tlula ku hlaya tindzima to tala hi xikongomelo xo lava ku hatla u heta Bibele. Vona leswi endlekaka. Anakanyisisa hi swilo hinkwaswo leswi endlekaka kwalaho. Yi tirhise kahle mimepe ni swikombo swa matsalwa lama fambisanaka ni mhaka leyi u hlayaka ha yona. Endla ndzavisiso hi mhaka leyi u nga yi twisisiki. Loko swi koteka heta nkarhi wo fana ni lowu u wu tirhiseke loko u hlaya leswaku u anakanyisisa hi rungula leri u ri hlayeke.