Hambileswi hingaliki hansi ka Nawu wa Moxe, Yehovha ahalangutele leswaku hiyingisa minawu yimbirhi leyikulu — kurhandza Yehovha ni munhukuloni. (Mt 22:37-39) Lirhandzu leli alingatawa hi le matilweni. Hifanele hilihlakulela. Hingaswiyendlisa kuyini? Yin’we ya tindlela i kudjondza Bibele siku ni siku. Kuyendla leswo switahipfuna kutiva wumunhu la Yehovha ni kuvona ‘kutsakisa kumbe wunene’ lakwe. (Ps 27:4) Swoswo switayendla leswaku lirhandzu la hina hi Yehovha likula naswona hitasungula kuvona swilo hi ndlela leyi yena ayivonisaka xiswona; hitasusumeteleka kuyingisa minawu ya Xikwembu, kupatsa ni nawu worhandza van’wana hi mbilu hinkwayu. (Yh 13:34, 35; 1Yh 5:3) Vona tindlela tinharhu letingakupfunaka kuva ni djondzo ya Bibele leyinandzihaka:

• Tivoni uli ndzeni ka rungula, likunghena! Tivoni uli ndzeni ka rungula leli ulidjondzaka. Uvona yini? Utwa yini? Kunun’hwela yini? Vanhu va kona vatitwisa kuyini?

• Cincacinca madjondzele ya wena. Hi leswi swin’wanyana ungahaswiyendlaka: Lerha hi ritu la le henhla kumbe ulandzisela a rungula leligravhariweke. Ungahahlawula kudjondza hi munhu wokarhi wa le Bibeleni kumbe hi mhaka yokarhi matshan’wini yolerha makapitulu hi kulandzelelana ka wona. Hi xikombisu, ungahatirhisa Xibukwana Xo Pfuneta Ku Dyondza Rito Ra Xikwembu xiyenge 4 ni 16 leswaku udjondza hi Yesu. Lerha Kapitulu hinkwalu leli tsalwa la siku lisusiweke ka lona. Lerha mabuku ya Bibele hi kuya hi nkama lowu matsaliweke hi wona.

• Lerha hi ndlela leyingatayendla leswaku uswitwisisa leswi uswidjondzaka. Swayampsa ulerha, upimisa ni kutwisisa kapitulu lin’we hi siku, matsan’wini yolerha makapitulu manyingi leswaku uhatla uheta rungula. Ehleketa hi ndhawu ni nkama lowu rungula litsaliweke hi wona. Kamba wuxokoxoko. Tirhisa mimapa, tinhlamuselo ni tindzimana tin’wana leti hi ntolovelo tikumekaka xikarhi kumbe hansi ka Bibele. Kamba mhaka leyi ukalaka ungayitwisisanga. Loko swikoteka, heta nkama lowufanaka ni lowu uwuhetaka na ulerha leswaku uyanakanyisisa.