Nangauli tili pasi pa Dango la Mozesi yayi, kweni dango lakuti titemwenge Chiuta na mzengezgani withu lichali lakuzirwa chifukwa likulongora ivyo Yehova wakukhumba kwa ise. (Mt 22:37-39) Palije munthu uyo wakubabika wakutemwa kale Chiuta na mzengezgani wake. Waliyose wakwenera kuchitapo kanthu kuti watemwenge Chiuta na mzengezgani wake. Kasi tingachita wuli? Nthowa yimoza nkhuŵazga Baibolo zuŵa lililose. Para tamanya makora mikhaliro ya Yehova iyo yikuzunulika mu Baibolo, vingatovwira kuti ‘tidodoliskenge uwemi wake.’ (Sa 27:4) Ivi vingatovwira kuti timutemwenge Yehova na kuwona vinthu umo iyo wakuviwonera. Vingatovwiraso kuti tisungenge malango ghake kusazgapo dango lakuti titemwenge ŵanyithu. (Yoh 13:34, 35; 1Yo 5:3) Wonani masachizgo ghatatu agho ghangatovwira kuti tikondwenge para tikuŵazga Baibolo:

• Muŵe nga mukuwona ivyo mukuŵazga. Mujitorenge nga kuti namwe mukaŵapo. Muŵe nga mukuwona ivyo vikuchitika, kupulika chongo na sungu la vinthu. Kasi ŵanthu awo ŵali mu nkhani iyo mukuŵazga ŵakwenera kuti ŵakujipulika wuli?

• Musinthenge nthowa zakuŵazgira. Mungaŵazga mwakukwezga, panji kutegherezga ivyo vili kujambulika uku mukulondezga mu Baibolo linu. M’malo mwakuŵazga waka machaputara mwandondomeko yake, mungaŵazga nkhani ya munthu munyake uyo wakuzunulika mu Baibolo panji mungaŵazga waka nkhani yinyake. Mwachiyelezgero, mungajura Vyakusazgirapo A7 panji B12 mu Baibolo la Malemba Ghakupatulika mu Mang’anamuliro gha Charu Chiphya na kuŵazga vyakukhwaskana na Yesu. Mungaŵazga chaputara chose cha apo pafuma lemba la zuŵa. Mungaŵazga mabuku gha mu Baibolo kuyana na nyengo iyo ghakalembekera.

• Ŵazgani kuti mupulikiske. Chingaŵa makora kuŵazga chaputara chimoza na kuchipulikiska, kuluska kuŵazga machaputara ghanandi na chilato chakuti mumare. Ghanaghanirani umo vinthu vikaŵira. Yezgani kumanya nkhani yose. Mungawona mapu na mavesi ghanyake ghakukhwaskana na ivyo mukuŵerenga. Fufuzani fundo iyo mundayipulikiske. Para mungafiska, nyengo iyo mwamalira pakuŵazga yikwenera kuyana na iyo mughanaghanirengepo.