KE OLA E PELĀ ME NE KELISIANO
Alofa ki te Atua mo ‵Tou Tuakoi—Te Auala ke Ati Aka ei ne Tatou
E tiga eiloa ko se ‵nofo a Kelisiano mai lalo i te Tulafono faka-Mose, kae ko fakatonuga konei e lua—ke a‵lofa ki te Atua mo ‵tou tuakoi—koi faka‵mafa mai eiloa i ei a mea e manako te Atua ke fai ne tatou. (Mat 22:37-39) A te vaegā alofa tenā e seki fa‵nau mai mo tatou. Se uiga e ‵tau o ati aka ne tatou. E pefea la? A te auala tāua e tasi ko te fai‵tau faeloa ki te Tusi Tapu. Kafai e suke‵suke tatou ki vaega kese‵kese o uiga o te Atua kolā ne fakaasi mai i te Tusi Tapu, ko maua ne tatou i ei a “te gali o Ieova.” (Sal 27:4) Kae ko te ikuga, ka gasolo aka te ‵tou a‵lofa mō ia kae ka mafau‵fau foki tatou e pelā mo ia. E fakamalosi mai ne te mea tenei ke faka‵logo eiloa tatou ki fakatonuga a te Atua, e aofia i ei a te fakatonuga ke fakaasi atu te alofa sē fakapito ki nisi tino. (Ioa 13:34, 35; 1Io 5:3) Konei a manatu fesoasoani e tolu ke fai ei ‵tou faitauga ki te Tusi Tapu e pelā me se mea fakafiafia:
-
Fakaataata a mea i tou mafaufau, kae fakaaoga ou mata, taliga, isu mo lima. Fakaataata i a koe e nofo atu i konā. Se a te mea e lavea, lagona, kae ‵sogi ne koe? Ne a lagonaga o tino kolā e aofia i ei?
-
Fakamafuli‵fuli ou auala. Konei a nisi filifiliga: Faitau ki luga, io me tautali faka‵lei i te taimi e fakalogologo ei koe ki te faitauga fakalogologo. Faitau ki se tala o se tino i loto i te Tusi Tapu io me se mataupu i lō te faitau o mataupu i te fakasologa. E pelā me se fakaakoakoga, fakaaoga a te Mataupu Fakaopoopo A7 io me ko te B12 i te Tusi Tapu i te ‵Fuliga o te Lalolagi Fou ke faitau ki tala o Iesu. Faitau te mataupu kātoa telā e fakamatala mai ei te tala kātoa. Faitau a tala o te Tusi Tapu i te fakasologa i tausaga ne kamata o tusi ei.
-
Faitau ke malamalama. A te faitau ke malamalama i se mataupu e tasi i aso takitasi, kae mafaufau ‵loto ki ei e sili atu tena aoga i lō te faitau ki mataupu e uke ko te mea fua ke oti tau tusi ne faitau. Mafaufau ki te fakanofonofoga. Sukesuke faka‵lei ki fakamatalaga i ei. Fakaaoga faka‵lei a mape mo nisi tusi siki i te koga loto o te Tusi Tapu. Fai au sukesukega ki se manatu e tasi telā e se malamalama faka‵lei koe i ei. Kafai e mafai, ke fakaaoga a ou taimi ke mafaufau ‵loto ki mea e faitau ne koe.