Noa ’tu e ere faahou te mau Kerisetiano i raro a‘e i te ture a Mose, te haapoto noa â ra na faaueraa rahi roa ’‘e e piti i ta Iehova e titau ra ia tatou, oia hoi ia here i te Atua e i to tatou taata tupu. (Mt 22:37-39) Aita tera here e fana‘ohia i te fanauraa. E mea titauhia ia faatupu i te reira. E nafea ïa? Te tahi ravea faufaa roa, o te taioraa ïa i te Bibilia i te mau mahana atoa. A hi‘opoa ’i tatou i te mau huru maitatai e rave rau o te Atua faahitihia i roto i te Bibilia, e ite tatou i “te maitai o Iehova.” (Sal 27:4) Ei faahopearaa, e puai atu â to tatou here no ’na e e tuati atu â to tatou mana‘o i to ’na. E turai te reira ia tatou ia pee i ta te Atua mau faaueraa, mai te faaiteraa i te here ia vetahi ê noa ’tu e titauhia te tahi mau haapaeraa. (Ioa 13:34, 35; Io1 5:3) Teie te tahi mau mana‘o tauturu ia oaoa ’tu â tatou i ta tatou taioraa Bibilia:

• A faaohipa i to outou feruriraa. Ahiri o outou te taata tei ora na i te aamu, eaha ta outou e ite ra, e faaroo ra e e hau‘a ra? Eaha paha te mau huru aau o te mau taata o te aamu?

• A taui i ta outou huru taioraa. Teie te tahi mau mana‘o: A taio ma te reo puai aore ra a pee i te taioraa a faaroo ai i tei haruharuhia. E nehenehe e taio i te mau pene te tahi i muri i te tahi. E nehenehe atoa râ e taio no nia i te hoê taata o te Bibilia aore ra no nia i te hoê tumu parau. Ei hi‘oraa, a faaohipa i te buka iti Guide d’étude de la Parole de Dieu i te tuhaa 4 aore ra 16 a taio ai no nia ia Iesu. A taio i te pene taatoa o te irava mahana. A taio i te mau buka Bibilia ia au i te taime i papaihia ’i te reira.

• A taio no te taa. Mea maitai a‘e ia taio hoê noa pene i te mahana taitahi ma te taa e ma te feruriruri i nia i te reira i te taioraa e rave rahi pene no te faahope noa i te taioraa Bibilia. A hi‘o i tei tupu a faahitihia ’i te mau parau o te taioraa. A hi‘opoa i te mau tuhaa rii. A faaohipa i te mau hoho‘a fenua e te mau nota i raro a‘e i te mau api. A rave i te mau maimiraa no te hoê paha mana‘o ta outou i ore i taa. Ia nehenehe, a rave hoê â maororaa no te taio e no te feruriruri.