Моисейниң хоойлузун христианнар сагывас-даа болза, Бурганга болгаш чанында кижиге ынак боор дээн ооң эң чугула ийи айтыышкыны Иегова бистен чүнү күзеп турарын билип аарынга дузалаар (Мф 22:37—39). Ындыг ынакшыл анаа тыптып келбес. Ону сайзырадыры чугула. Канчаар сайзырадырыл? Чугула негелделериниң бирээзи — Библияны хүннүң-не номчууру. Бурганның шынарларының аңгы-аңгы талаларын Библиядан билип ап тургаш, Иегованың «өндүр чырыын» эскерип эгелээр бис (Ыр 26:4). Бурганга бистиң ынакшылывыс өзүп, угаан-сарыылывыс Аңаа оон-даа артык дөмейлежи бээр. Ол чүүл Бурганның айтыышкыннарын сагыырынче база өске улуска бодун хайыралавас ынакшылдыг болурунче оттурар (Ин 13:34, 35; 1Ин 5:3). Оон-даа сонуурганчыг кылдыр Библияны номчуурунга дузалаар бо каш сүме:

• Даап бодаашкынны болгаш минниишкиннериңни ажылдат. Бодуңну ол үеде турар кылдыр сагыштаала. Чүнү көрүп, дыңнап, миннип болур сен? Болуушкуннуң дорт киржикчилери кандыг минниишкинниг бооп болур?

• Янзы-бүрү аргаларны шене. Чамдыызын көрээлиңер. Ыыткыр номчу азы аудиону дыңнавышаан, эдертир көр. Шилилгелиг номчуурун шене: бир болза сени сонуургадып турар теманы азы бир кижиниң дугайында үзүндүнү. Чижээ, Иисустуң дугайында сеңээ хөйнү билип алырынга, «Слово Бога в картах и схемах» деп брошюра дузалаар (Капсырылга 4 биле 16). Хүнде номчуур шүлүктүң эгезин долузу-биле номчу. Библияны бижиттинген аайы-биле номчуп болур.

• Боданмышаан номчу. Санын бодап, хөй эгелер номчуурунуң орнунга, хүнде чаңгыс эгени эки билип аар кылдыр бодамчалыг номчааны дээре. Төөгүлүг болуушкуннарже болгаш долу утказынче база өске кезектеринче кичээнгейни сал. Карталарны ажыглап, тайылбырны болгаш шөлүглерни көр. Болдунар-ла болза, билдинмейн барган бир айтырыгны шинчиле. Аргалыг болза, номчуурунче чеже үе үндүрген сен, ол хире үени боданырынче үндүр.