Te j-abatotik yuʼun Dios maba sujbilotikix ta spasel te Ley yuʼun Moisés, pero te cheb mukʼul mantalil te jaʼ te kʼuxuk ta koʼtantik te Dios sok te jpatxujktike, jaʼ te bin yato skʼanbotik te Diose (Mt 22:37-39). Te kʼuxul oʼtanil-abi ya skʼan ya jchʼijtestik ta koʼtantik, melel ma jichuknax ta tael. ¿Bin-utʼil? Jaʼ te kʼalal ya jkʼopontik te Biblia ta jujun kʼajkʼale. Te kʼalal ya jnopilan ta koʼtantik te bin ya jkʼopontike yame jtatik ta ilel te tʼujbil taleliletik yuʼun te Jehová sok ta yilel te kʼax lek te yoʼtane (Sl 27:4). Teme jich ya jpastike yame xmukʼubxan te skʼuxul koʼtantik ta stojole sok jichme ya jnoptik-euk te bitʼil snopjibal yuʼune. Jaʼ-abi ya stij koʼtantik ta schʼuunbeyel te mantaliletik yuʼun, te tey smakojbey skʼoplal-a te kʼuxuk ta koʼtantik te yantik te maʼyuk bin ya jmaliytik ta swentae (Jn 13:34, 35; 1Jn 5:3). Akʼa kiltik oxchajp te bintik ya skoltayotik swenta ya jmulantikxan kʼoponel te Bibliae.

• Akʼa jnop kaʼiytik te bin ya jkʼopontike. Akʼa jnop kaʼiytik te tey ayotik-ae. Akʼa jpastik tulan ta yilel kʼoem te bin yak ta kʼoel ta pasele, kaʼiytik kʼoem te bintik ya xkʼopoje sok kaʼiybeytik yikʼ kʼoem te bintik tey-ae. Akʼa jnop kaʼiytik te bin yaʼiyel ya yaʼiy sbaik te machʼatik tey-ae.

• Yantikxan te bitʼil ta pasel. Ya xjuʼ ya jkʼopontik ta tulan te Bibliae o kʼalal ya kaʼiytik jun grabasion ya xjuʼ ya jtʼuntik bael te bin yak ta kʼoponele. Ma puersauk te ya jkʼopontik ta sjajchibal kʼalal ta slajibal te Bibliae, yanxan te bin ya xjuʼ ya jpastike jaʼ te ya jnopbeytik skʼoplal ta swenta jtul ants winik o ta swenta jun tema te yal te Bibliae. Jun ejemplo, ya xjuʼ ya jtuuntestik te seccion 4 A, B, C, D, E, F, G, H sok 16 A, B yuʼun te foyeto Guía para el estudio de la Palabra de Dios ta swenta snopbeyel skʼoplal te Jesuse. Jaʼnix jich ya xjuʼ ya jkʼopontik te kapitulo te banti lokʼ tal skʼoplal te texto yuʼun jujun kʼajkʼale o ta skʼoponel te Biblia jaʼ chikan te bin libro la yichʼ tsʼibayel ta naile.

• Kʼotuk ta koʼtantik te bin ya jkʼopontike. Jaʼ lekxan te ya jkʼopontik jun-nax kapitulo ta jujun kʼajkʼal sok te ya jnopilan ta koʼtantike ma jaʼuk te ya jkʼopontik bayal kapitulo swentanax ya xbeen ta kʼoponel kuʼuntik-a te Bibliae. Akʼa jnoptik te bintikxan kʼot ta pasel ta swenta te bin yakotik ta skʼoponele. Kiltikxan ta tsʼakal te bintik yichʼoje. Jtuuntestik te mapaetik sok te textoetik te ayik ta xujke. Jaʼnix jich akʼa jlebeytik skʼoplal junuk te bin ma kʼot ta koʼtantike. Te jayeb tiempo ya jkʼopontik te Bibliae jichuknix stiempoil ya jnopilan ta koʼtantik-euk.