Akʼo mi muʼyuk xa ta jchʼuntik skotol li Smantal Moisese, li chaʼtos mantaletik laj yal ti tsotsik skʼoplale, li skʼanel Dios xchiʼuk li yantike, muʼyuk bu jelem-o, yuʼun jaʼ li kʼusi tskʼanbe-o li yajtuneltak Diose (Mt 22:37-39). Pe li kʼanelal taje skʼan jchʼiestik, ¿kʼuxi ta pasel? Jaʼ ti jchantik skotol kʼakʼal li Vivliae xchiʼuk ti jnopbetik skʼoplale, kʼalal jech ta jpastike ta jchanbetik li slekil talelaltak Diose xchiʼuk te chkakʼtik venta xtok ti toj lek yoʼontone (Sl 27:4). Mi jech ta jpastike mas me ta jkʼantik xchiʼuk jaʼ jech chlik jnoptik jech kʼuchaʼal tsnop li stuke. Taje jaʼ me tstij koʼontontik yoʼ jchʼunbetik li smantaltake xchiʼuk ti jkʼantik li yantike (Jn 13:34, 35; 1Jn 5:3). Jkʼeltik batel oxtosuk kʼusitik xuʼ skoltautik yoʼ jkʼupintik xchanel li Vivliae.

• Jtunes li jnopbentike xchiʼuk kaʼibetik lek smelolal. Jnoptik ti te xa oyutik li ta loʼile. Teuk xa me jkʼelojtik li kʼusitik chkʼot ta pasele, kaʼitik li kʼusitik chbakʼanuke xchiʼuk xkaʼibetikuk li yikʼ kʼusitike. Jnoptik kʼu yelan laj yaʼi sbaik li buchʼutik te oy li ta loʼil ta Vivliae.

• Jeltik ti kʼu yelan ta jkʼeltike. Xuʼ me tsots jchantik o xuʼ jchikintatik junuk gravasion ta audio, vaʼun jtsʼaklitik batel. Li kʼusi stakʼ jpastik xtoke jaʼ ti jchanbetik skʼoplal li loʼiletik ta Vivliae o xuʼ yan kʼusitik jchantik. Jech kʼuchaʼal liʼe, xuʼ me jtunestik li foyeto Koltael sventa xchanel Skʼop Dios li ta xchanobil 4 xchiʼuk 16 ti te chalbe skʼoplal ta sventa li Jesuse. Yan xtoke, jaʼ ti jchantik sjunul li kapitulo ti bu lokʼem tal li teksto sventa jujun kʼakʼale o jchantik li Vivlia ti kʼu yelan lek xcholet yichʼoj tsʼibaele.

• Kaʼibetik lek smelolal li kʼusi ta jchantike. Mas lek mi jaʼ noʼox jun kapitulo ta Vivlia ta jchantik yoʼ jnopbetik lek skʼoplale, jaʼ vokol mi jaʼ noʼox ta jkʼantik ep kapitulo ta jkʼeltike. Jaʼ lek ti jnopbetik skʼoplal li kʼusi chale, jsabetik lek smelolal li jujupʼel kʼope, jtunestik li mapaetike, li tsʼibetik ti chtakvan batel ta yan tekstoetike xchiʼuk jsaʼtik ta yan vunetik li kʼusi mu xkaʼibetik smelolale. Mi xuʼ kuʼun chkiltike jchʼakbetik lek yorail ta snopbel skʼoplal, ti maʼuk noʼox ta jchantike.