Гәрчә Тәврат қануни мәсиһийләргә тегишлик болмисиму, икки әң муһим әмир, йәни Худани вә йеқинлиримизни яхши көрүшимиз түпәйлидин, Йәһва биздин немини тәләп қиливатқанлиғини чүшинимиз (Мт 22:37—39). Мошундақ меһир-муһәббәт мирас болуп қалмайду. Уни риваҗландуруш керәк. Лекин қандақ қилип? Буниң бир йоли — Муқәддәс китапни һәр күни оқуш. Муқәддәс китапта ейтилған Худаниң һәртүрлүк хисләтлири һәққидә мулаһизә қилғанда, «Пәрвәрдигарниң гүзәллигини» көргәндәк болимиз (Зб 27:4). Нәтиҗидә, Худаға болған меһир-муһәббитимиз өсүп, пикир қилиш тәрзимиз униңкигә көпирәк охшаш болиду. Бу бизни Худаниң әмирлиригә, шу җүмлидин, башқиларға нисбәтән пидакар меһир-муһәббәт көрситишни тәләп қилидиған әмирләргиму, риайә қилишқа дәвәт қилиду (Йоһ 13:34, 35; Й1х 5:3). Кәлтүрилгән үч мәслиһәтниң ярдими билән Муқәддәс китапни оқушта қанаәт тапалаймиз:

• Тәсәввур қилип, һис-туйғулириңизни ишлитиң. Оқуватқан вақиәниң иштирақчиси дәп тәсәввур қилиң. Немиләрни көрүватисиз, аңлаватисиз вә қандақ пурақларни сезиватисиз? Вақиәниң башқа иштирақчилири немиләрни һис қиливатиду?

• Оқуш усуллириңизни өзгәртип туруң. Буниң бирнәччә усулли бар. Үнлүк оқуң яки аудиоязминиң үзиндисини тиңшаң. Бапларни новәт билән оқушниң орниға, Муқәддәс китаптики қәһриманлар һәққидә яки мавзу бойичә оқуң. Мәсилән, Әйса һәққидә оқуш үчүн «Муқәддәс китап. Мәдһийә тәрҗимисиниң» Ә қошумчиси, 16-бөлүмни қоллансақ болиду. Күндилик айәт елинған бапни пүтүнләй оқусиңиз болиду. Язмилардики китапларни йезилиш тәртиви билән оқуң.

• Оқуғиниңизни чүшинишкә тиришиң. Күнигә бир бапни чүшинип оқуш һәм мулаһизә қилиш, көп бапларни оқуп чиқиштин әвзалирақ. Вақиәләр қачан вә қәйәрдә болуватқанлиғи һәққидә ойлап көрүң. Ушақ-чүшәк нәрсиләргә диққәт бөлүң. Хәритиләр вә бағлинишлиқ айәтләрни пайдилиниң. Кам дегәндә, чүшәнмигән бир ой һәққидә издиниш қилиң. Әгәр мүмкинчилик болса, қанчә вақит оқусиңиз, шунчә вақит мулаһизә қилиң.