Inenikristi rha hẹ otọ rẹ Urhi rẹ Mosis na-a. Ẹkẹvuọvo, iji rọyen ivẹ re ma rho, re dia e vwo vwo ẹguọnọ rẹ Ọghẹnẹ vẹ irivẹ rẹ avwanre na, dje oborẹ Jihova guọnọ mie avwanre. (Mat. 22:37-39) A cha sa riuku rẹ oka rẹ ẹguọnọ yena-a. A wian phiyọ. Vwẹ idjerhe vọ? Isese rẹ Baibol rẹ kẹdẹ kẹdẹ ọyen idjerhe ọvo. Avwanre de roro kpahen ẹbẹre sansan rẹ iruemu rẹ Ọghẹnẹ rehẹ Baibol na, avwanre ke sa mrẹ “erhuvwu rẹ Ọrovwohwo na.” (Une 27:4) Ọnana cha nẹrhẹ ẹguọnọ re vwo kpahen Jihova rhophiyọ, je nẹrhẹ e vwo oka rẹ iroro ro rhere. Ọnana che mu avwanre vwọ kerhọ kẹ iji rẹ Ọghẹnẹ ro churobọ si iji re vwo vwo ẹguọnọ rẹ omaevwoze kẹ ihwo efa. (Jọn 13:34, 35; 1 Jọn 5:3) Iroroẹjẹ erha re sa nẹrhẹ wọ riavwerhen rẹ isese rẹ Baibol wẹn:

• Vwẹ ẹwẹn roro. Vwẹ ẹwẹn roro nẹ wẹ hẹ etiyin. Die wọ cha mrẹ, nyo, ji roro? Die yen sa dia iroro rẹ ihwo wo se kpahan na?

• Wene ona rẹ isese na. Ni iroroẹjẹ evo: Se phia, yẹrẹ kerhọ kẹ isese re ru phiyọ uhworo, jẹ wọ vwẹ ẹro nene. Se kpahen ohwo yẹrẹ uyovwinrota ọvo, ukpe wo vwo se vwo nẹ uyovwin ọvo kpo ọfa. Kerẹ udje, reyọ Appendix A7 yẹrẹ B12 rọhẹ New World Translation of the Holy Scriptures vwo se kpahen Jesu. Se uyovwin na ejobi ra reyọ ọbe rẹ kẹdẹ kẹdẹ na nurhe. Se ẹbe rẹ Baibol na vwo nene obo re si ayen kpahen ohwohwo.

• Se rere wo vwo ẹruọ rọyen. Re vwo se uyovwin ọvo kẹdẹ kẹdẹ, rere e vwo vwo ẹruọ rọyen, ji roro kpahọn, yovwin nọ e vwo se iyovwin buebun kidie nẹ a guọnọ fobọ se Baibol na re. Roro kpahen obo re phiare ọke re vwo si ẹkpo wo se na. Fuẹrẹn ẹkpo na eje. Reyọ imapu vẹ ẹkpo efa ra rionbọra vwo ruiruo. Hiẹ kpahen ẹkpo ru wo vwo ẹruọ rọye-en. Ọ da dia obo wo se ru, ghwọrọ uche ọke wo vwo se na vwo roro kpahen obo wo seri na.