MaKristau khanikhanyereriwa otthara Nlamulo na Moise. Masi, sooruma piili suulupalexa sa Nlamulo sinnooniherya ele Yehova onnivekela awe: Omphenta yena ni mukhwiihu. (Mat 22:37-39) Khuuvo mutthu oniyariwa omphentaka Muluku ni mukhwaawe. Nto nihaana wiimananiha. Moota xeeni? Enamuna emosa yuulupale, ori omusoma Biibiliya khula nihiku. Okathi onithokorerya ahu mikhalelo sa Muluku siniphwanyaneya mBiibiliyani, nnimoona ‘orera murima’ wa Yehova. (Esa 27:4) Nto, omphenta wahu Muluku onimuncerereya ni nnookhalana mikhalelo sooloka ntoko yena. Nave eyo, enooniiriha wiiwelela sooruma sa Muluku, ntoko yooruma ya waaphenta atthu akina. (Yoh 13:34, 35; 1 Yoh 5:3) Inamuna 3 sinittharelana sinooniherya moota woottottela mureerelo omusoma Biibiliya:

• Muupuweleleke ni Mmananiheke Woona Ele Eniiraneya. Okathi onisoma anyu, mukhaleke ntoko muri opuro yoowo wiiraneya aya itthu iyo, hoothe ni atthu anromoliwa epantte eyo. Mmananiheke wiiwa itthu sinruma, itthu sininkhela, ni moonelo wa atthu anromoliwa.

• Murumeeleke Inamuna Soovirikana sa Osoma. Musomeke moowiiwanyeya, wala mutthariheleke okathi muniwiriyana anyu osommwa wa Biibiliya woogravariwa. Musomeke epantte enimuromola mutthu wala mwaha mmosa wa mBiibiliyani ohiya otthara ikapiitulu. Mwa ntakiheryo, wira musome sowiiraneya sa okumi wa Yesu murumeele epantte 4 wala 16 ya elivirinyu eni: Malakiheryo Anikhaliherya Osoma Nuulumo na Muluku. Aahiiso, pooti osoma ekapiitulu yotheene ekumihiwe aya yoolepa ya nihiku. Nave, musomeke iliivuru sa Biibiliya moovarihana ni okathi olempwale aya.

• Mwiiwexexeke ele enisoma anyu. Phataari osoma ekapiitulu emosa khula nihiku wira mwiiwexexe ni wuupuwelela, ohiya osoma ikapiitulu sinceene masi muhiiwexexaka. Muupuweleleke ni muthokoreryeke itthu siniromoliwa opuro owo. Murumeeleke maapha ni inoota vathi va epaaxina. Mutokoseke mwaha muhiiwexenxe anyu. Vaaweryaneyaka, okathi nvirihe anyu musomaka, nviriheke-tho okathi omosaru muupuwelelaka ele musomme anyu.