Bisan kon diri na obligado an mga Kristiano nga sundon an Mosaiko nga Balaud, an duha nga pinakaimportante nga sugo hito nga amo an paghigugma ha Dios ngan ha igkasi-tawo nagpapabug-at la gihap ha kon ano an ginkikinahanglan ha aton ni Jehova. (Mat 22:37-39) An sugad nga gugma diri napapanunod. Sadang ito kultibaron. Paonan-o? Usa nga importante nga paagi amo an pagbasa han Biblia kada adlaw. Kon gintatagad naton an iba-iba nga bahin han personalidad han Dios sugad han mababasa ha Kasuratan, aton nakikita an “katahom ni Jehova.” (Sal 27:4) Sugad nga resulta, maghihilarom an aton gugma ha iya ngan an aton panhunahuna magigin puropariho han iya panhunahuna. Tungod hini, maaaghat kita nga sundon an iya mga sugo, upod na an sugo ha pagpakita hin nagsasakripisyo nga gugma para ha iba. (Ju 13:34, 35; 1Ju 5:3) Iini hin tulo nga suhestyon basi magin mas makalilipay an pagbasa han Biblia:

• Gamita an imo imahinasyon ngan mga sentido. Handurawa nga kaapi ka ha panhitabo. Ano an imo nakikita, nababatian, ngan naaamyon? Ano an bangin gin-aabat hadton mga nahidadabi?

• Iba-ibaha an imo paagi. Aadi hin mga opsyon: Basaha ha daku nga tingog, o sundi an audio recording samtang nagbabasa. Pagbasa mahitungod ha partikular nga tawohan o topiko ha Biblia imbes nga basahon hin sunod-sunod an mga kapitulo. Pananglitan, gamita an Seksyon 4 o 16 han bokleta nga Giya ha Pag-aram han Pulong han Dios basi dugang nga mahibaro mahitungod kan Jesus. Basaha an bug-os nga kapitulo diin ginkuha an inadlaw nga teksto. Basaha an mga libro han Biblia uyon ha petsa han pagkasurat hito.

• Sabota an imo ginbabasa. An pagbasa hin bisan usa la nga kapitulo kada adlaw nga may pagsabot ngan ginpapamalandong, mas maopay kay ha pagbasa hin damu nga kapitulo basi la makatapos ha pagbasa. Hunahunaa an kahimtang. Usisaha an mga detalye. Gamita an mga mapa ngan an mga reperensya. Pagsaliksik hin bisan usa la nga punto nga diri mo nasasabtan. Kon mahihimo, paggahin hin panahon ha pagpamalandong nga pariho kahilawig han panahon nga nagamit mo ha pagbasa.