Tsy irahin̈y mitandrin̈y Lalàn̈any Mosesy eky atsika. Fa ndray zen̈y mamintin̈y tsarabe raha takiny Jehovah amintsika didy aroe farany maventy amizio ao. Didy man̈iraka atsika ho tia Zan̈ahary ndreky tia naman̈a. (Mt 22:37-39) Raha zen̈y mila ezaka fa tsy mandeha ho azy. Ino raha mila atao? Raha araiky maventy mamaky Baiboly isanandra. Hahita “hatsaran̈any Jehovah” atsika, izikoa mandiniky toetrinany isankarazany amy Baiboly ao. (Sl 27:4) Hahay ho tia izy atsika, baka io hahaihitovy fomba fisain̈ana aminany. Manjary tihan̈araka didinany atsika, an̈isanizen̈y didy man̈iraka atsika ho tia ndreky hahafoe ten̈a aminolo. (Jn 13:34, 35; 1Jn 5:3) Misy fomba telo han̈ampy anao ho tia tsarabe mamaky Baiboly ty:

• Aleva sary antsain̈y raha vakinao. Iritrireta karaha iain̈anao in̈y izio. Ino raha hitanao ndreky ren̈inao, baka io ino fofoko raha ren̈inao? Ino raha mety tsapanolo voakoran̈a ao?

• Ivoàvoà fomba amakinao izy. Misy sosokevitry ty: Vakia mare andininy aby io, na mitandrin̈esa andininy nalain̈y feo ke areha amy Baiboly. Aza asesy toko aby io fa mamakia tantaranolo araiky na fotokevitry araiky. Ampiasà, ohatra, Fizaran̈a 4 na 16 amy Fitaovan̈a Fianaran̈a Soratra Masin̈y, izikoa fa mamaky tantarany Jesosy. Na vakia andininy jiaby amy toko nangalan̈a teny vakina isanandra. Mety asesinao arakaraka fotoan̈a nanoratan̈a izy koa iro boky amy Baiboly ao.

• Ataova mazava aminao raha vakinao. Sitrany mahavoavaky toko araiky isanandra fa mazava ndreky voasaintsain̈y tsarabe, toizay mamaky toko maro baka ho malaky vita fo. Diniha teny man̈odidin̈y. Fakafakà tsipiriany. Ampiasà sarintany ndreky fanondroan̈a andininy hafa. Ataova fikarohan̈a farifaratsiny, araiky aminy hevitry tsy mazava aminao. Izikoa mety, ataova mitovy fotoan̈a laninao amakian̈a ndreky isaintsain̈ana.