Wa vura duhe nga, ga Moize aNdiko na ome kurii aKristano te, gu gaha abangua arugute du ue nga—ka kpinyemu Mbori gbiati akuarani—nayugo gupai kindi Yekova aidaha berani. (Mt 22:37-39) I avunganga rani na ngbatunga gi nyemuse re te. Si naida ani sonosihe asonosa. Wai gu rengbe ani ka sonosaha? Bangua gene sa nga, ni geda ani Ziazia Kekeapai dedede. Ho ani awisigopai ni tipa agu asino Yekova i nayuguhe rogo Ziazia Kekeapai yo, ani nabi “gu wene ngbanya nga ga Yekova.” (Tam 27:4) Ni sangbanaha, gaani nyemuse tipa ko nika sona na ani ki tona ka du na gako aberã. Gipai re nafõ rani tipa ani gi sangba ga Mbori arugute, kodihe na gu rugute du tipa yugo nyemuse tipa kura aboro angianga fu kina tirani ya. (Yo. 13:34, 35; 1 Yo. 5:3) Bete aberãpai gere biata rengbe ka sa ro mo gbia ngbarago ti gamo geda Ziazia Kekeapai:

• Mo mangisunge na berãro, gbiati agu abarapa ro mo ainapai na ni. Mo berẽnga pa tiro nga mo du yo. Ginihe ka mo naabihe, giaha, na kini gi fuoho? Wai gu du ga agu aboro bipai du rogo yo?

• Mo saki gamo gene gedapai. Bete agene gere: Mo gedipai na fugoro kuari, watadu mo pekefuo dede gedigedi fugo Ziazia Kekeapai. Mo gedipai tipa boro sa rogo Ziazia Kekeapai yo watadu mo siapai tipa ka gedapai tipaha kuba geda akapita ti genehe. Ni kpiapai, mo mangisunge na Mounda Tipa Wisigo Fugo Mbori, gu paparaha nga ga 4 watadu 16 tipa ka gedapai tipa Yesu. Mo gedi agu agene waraga dunduko i nadi agu averesi du tipa aˈuru ni basasa rogoho. Mo gedi Ziazia Kekeapai ni peka mo fuo gu gene i akehe ngbaha.

• Mo gedipai kini gi rogoho yo. Pa geda ani bangisa kapita rogo aˈuru ni basasa kini gi rogoho yo na kini berẽkuriihe ni bawenepai ki susi ti geda ani dungu akapita tipa ka nyasa gedaha gbua. Mo berẽ pa wai i akehe. Mo wisigi gu futufutu apai du tipaha. Mo mangisunge na gbakigbaki kpiarago na agu averesi nandu na akuraha. Mo mangi wetekapai tipa gupai mo aruganga tiro na ni ya. Ka si rengbe, mo di kina gu bangisa regbo ka mo ni dihe kuti gedapai ka berãkuriihe.