Ná diti noʼno ló xomandary Xiley Moisés, par Dios nigolú rasac guisobno chop mandamientos ni más rasac ni ná que gandxiʼno Láabu né gandxiʼno saʼno (Mt 22:37-39). Diti golnéno galnadxiʼ por ngú raquiin gonyno por gapno láani. ¿Ximod? Toib mod ni más rasac par gapno láani ngú golno la Biblia guirá dzú. Órni ronyno pensary ló ni cayolno, raduidyno cuent xi clas Dios nac Jehová né balaati natzaaybu (Sl 27:4). Ndeʼ rony que gandxiʼno láabu más, né rasuidyno ronyno pensary xomod láabu. Né ngú rachiin lóono guisobno ni rony mandarybu, ladni noʼ gandxiʼno stipnés buñ (Jn 13:34, 35; 1Jn 5:3). Guisuidyno tzón mod ni gacné lóono par guioladxno golno la Biblia.

• Gonyno pensary ló ni cayolno. Gonyno pensary que noʼno lagarycu. Gonyno por guibiʼno xi cayac, guicadiagno ruid ni noʼ né guienno xpuu lagarycu. Gonyno pensary xi gosac buñ ni rasetlaa historiacu.

• Gonyno láani de xidal mod. Labúu golno láani fuers o guicadiagno toib grabación laʼga guicanalno lectura. Stoib mod ni labúu gonyno ngú golno de toib buñ ni rasetlaa la Biblia o de toib tema ni rioladxno xalagary golno la Biblia ro rasalóni né dada ro radopyni. Láaca labúu guiquiinno midid 4 né   né 16 ni sieed ló follet ni laa Ni gacné lóono guientzaayno Xtiitz Dios par golno de Jesús. Stoib mod ni labúu gonyno ngú golno capítulo ro bireʼ texto ni rolno guirá dzú o golno libros ni sieed ló la Biblia xomodpa cuáni.

• Guientzaayno ni cayolno. Más galán láani golno toib capítulo por dzú né guienno ni cayolno né gonyno pensary loni, xalagary golno xidal capítulos par guiegsi laani. Gonyno pensary ló versículos ni sieed antes né después, guisuidytzayno láani, guiquiinno mapas né referencias marginales, né pal diti rienno toib texto guiyopyno información. Pal labúuni, tiemp ni rolno la Biblia, tiemp cuca cueʼno par gonyno pensary ló ni ma bíilno.