Mbaya mir acaki mi kusika mwa mir Internet bebedo ku thiwiwec man video ma juyiko pi nitelo nen mi dhanu m’adundegi tie atira. (Tic 13:48) Wang’ ma pol ebed eketho peko iwi lembang’eya kunoke iwi lembe moko ma dhanu ubeparu man gibeweco i wiye.

Icopo tiyo nenedi ku mbaya mir acaki mi jw.org i tic peri mi lembanyong’a?

• Bed imond nja i jw.org. Nen thiwiwec ma nyen m’uwok, man par kite m’icopo tiyo ko kude pi nikonyo ng’atu moko m’unyutho nen ma ber. Kan ibed ineno piny m’uwok i kusika mwa mir Internet, eno bikonyi nibedo ku paru ma nyen m’iromo tiyo ko i tic peri mi lembanyong’a.

• Tii ku thiwiwec man video ma juketho i mbaya mir acaki mi jw.org pi nicaku wec. Jamtic maeno copo miyo iwa paru iwi lembe ma nyo dhanu mi therithwar mwa gibeparu.

• Nyuth mbaya mir acakine ni dhanu. Keth peko iwi thiwiwecne ma copo telo nen lee, man nyuth ni ng’atune kite m’ecopo sayu ko lembe i jw.org.

• Or lien (link) ma jucopo mondo ko i mbaya mir acakine. Dhanu moko bemito ngo giwec kudwa wang’ ku wang’, ento nwang’u gitie ayika nimondo i kusika mwa mir Internet. Pieno, kud ilwor nioro lien (link) ma terojo i mbaya mir acaki mi jw.org, ni dhanu ma ponji utelo nen migi; icopo oro igi bende lien mi thiwiwec kunoke mi video ma junyutho i mbaya mir acakine.