˗Aˈa Ɛtɛnɛtɩ a dlɛsɩ a tɛkäkpʋ ˈklʋ, lagɔbɔgwɩ ˗ɲɛ videwi ˈsɔ ˗wʋ ˗lɛ. Nɩkpa ˗wa yɔnɩɛ dila ˈwʋ, wa za wa ˗bhɩɛ. (Nʋ 13:48) ˗Mä bhlɩɩ ˈmö a ˗lii ˗yɩ ˈplɩɛ ˈwʋ ˈlili ˈwʋ, ˗yɩɲɩ wɛlɩɩ nɩkpa bhïla, ˗aˈa ɛtɛnɛtɩ a tɛkäkpʋ bhïlamöˈɛ yɩ wɛlɩɩ.

Sɛɛ ˗a bhɛnɩ ɔ ˗a ˈkä ˗aˈa ɛtɛnɛtɩ a tɛkäkpʋ ˈmö ghlɛnɩ ˗mä ˗aˈa lagɔwɛlɩbialibhoo ˈmö ˈnɩ?

• ˗A nɩ mö ˈkwädlɩ ˗mä ˗aˈa ɛtɛnɛtɩ a dlɛsɩ ˈklʋ. ˗Lii wa zʋä ˈlili ˈwʋ ˗mä ɛtɛnɛtɩ ˈklʋ, ˗a nɩ yɩlii yɔwʋ nzɩ sɛɛ ˗a ˈkɩɛ ˈmö ghlɛnɩ ˗a ˈkä nɩkpa kwänɩ, ˗a ˈkä ˗sɩbhä sɛ tɛlɩ. (˗Aˈa ɛtɛnɛtɩ a dlɛsɩ a tɛkäkpʋ ˈklʋ, ˗lii ˗yɩ ˈwlʋä ˈlili ˈwʋ, ˗n ˈkɩ ghlɩ a dɔˈwʋ, dɛɛ wa ˈzʋä “ˈYɩ yɩ ˈwuë ˈylɩmö” pɩɛnɩ ˗lɛ ˈwʋ.) ˗Aˈa ɛtɛnɛtɩ a dlɛsɩ ˈklʋ a ˗lii, ˗a ˗kɩ ˈkwädlɩ yɔwʋ yɩlɩɩ, ˗a yi ˗lii ˗yɩ ˈwlʋä ˈlili ˈwʋ ˈcɩɛ ˈyize, ˈn ˗a ˈnaa ˈkä nimï tʋʋ ˗mä ˗aˈa lagɔwɛlɩbialibhoo ˈmö.

• Lagɔbɔgwɩɩ ˗ɲɛ videwi ˈsɔ ˗yɩ ˗wʋä ˗mä ˗aˈa ɛtɛnɛtɩ a dlɛsɩ a tɛkäkpʋ ˈklʋ, ˗a nɩ ghlɛnii ˈmö ˗a ˗ɲɛ nɩkpa ˈkä ˈdɩsɛsʋ tɛɛ. Yɩ bhɛnɩ yɩ ˗kaɲɩ kwänɩ ˗a ˈkä ˗mä ˗aˈa pɩɔ ˈyli a nɩkpa a dlɩpäsaa yɩbhlɩnɩ.

• ˗A nɩ tulanɩ ˗aˈa ɛtɛnɛtɩ a dlɛsɩ a tɛkäkpʋ nɩkpa ˈylimö. ˗A nɩ pɩɛnɩ kïbhï ˗yɩ kää dɛsɛ ˈwʋ, ˈn sɛɛ wa ˈkää ɛtɛnɛtɩ a dlɛsɩ libho ˈmö nʋnɩ, ˗a nɩ sʋlʋnuë ˗sɩbhä.

• Wa laa lien, ˗a nɩ ˈpɔɲɩ ˈyio ˈwʋ. ˗Mumuë ˗ɲɛ ˗abhʋa ˈkä ˈdɩ ˗sɛɛ, yɩ ˈtɛɛnuë ˈtikïyie ˈwʋ kɛˈmö, ˗maa wa ˗bhɩɔ ˈmö wa ˈkä ˗mä ˗aˈa ɛtɛnɛtɩ a dlɛsɩ ˈklʋ mö. ˗Sɩbhä ˗nʋa ˈla a dɔˈwʋ, ˗a nɩ tɩ bʋanɩ. Wa laa lien, wa ˈkää ˈmö ghlɛnɩ nzɩ wa ˈkä ˗mä ˗aˈa ɛtɛnɛtɩ a dlɛsɩ ˈklʋ mö, nzɩ wa ˈkä lagɔbɔgwɩ ˗ɲɛ videwi ˈsɔ ˈylɩmö, ˗a nɩ ˈɲʋaɲɩ.