El home page del diaton website tiene maga articulo y video que ya diseña para saca el interes del maga sincero persona. (Act 13:48) Mas mucho, ta discuti este maga topico que ta sale na noticia o acerca na maga cosas que ta pensa y ta discuti el maga gente.

Paquemodo tu usa con el home page del jw.org na de tuyu ministerio?

• Regular chequia con el website. Nota si cosa nuevo yan feature na diaton website y considera si paquemodo tu con este puede usa para ayuda con el un interesao persona. (Para puede mira otro material que nuevo lang yan feature na home page, man click con el “Sabe Pa Mas.”) Si esta tu updated na diaton website, puede este ayuda contigo para tiene maga nuevo idea que puede usa na de tuyu ministerio.

• Usa con el maga articulo y video que yan feature na home page para puede principia man cuento. Este maga material puede kanaton dale idea si cosa ta pensa el maga gente na teritorio.

• Dale mira con el home page na maga gente. Menciona maga especifico topico y dale mira si paquemodo puede incuntra informacion na website.

• Man share un link. El cuanto gente no quierre man cuento kanaton na personal pero conforme sila visita con el diaton website. Poreso no man alang-alang imbia con el maga interesao el link del home page o del un especifico articulo o video que puede mira alla.