Sɛ ibue hɛn wɛbsaet no a, ibohu nsɛm nye video ahorow a woesiesie no kwan bi do a ɔbɛka akomapafo a wɔnnyɛ Jehovah Adasefo no hɔn akoma. (Adw 13:48) Mpɛn pii no, ɔka nsɛm a opue wɔ TV, radio anaa Intanɛt do, nye nsɛm bi a ɔda nyimpa pii ano no.

Ibesi dɛn dze nsɛm a sɛ ibue jw.org wɛbsaet no a ihu no edzi dwuma wɔ asɛnka mu?

• Ɔyɛ a taa kɔ wɛbsaet no do. Hwɛ nsɛm afofor a wɔdze ato wɛbsaet no do, na hwɛ mbrɛ ibesi dze aboa akomapafo. (Sɛ epɛ dɛ ihu nsɛm a wɔdze ato wɛbsaet no do ndaansa yi ara, klek “Hwɛ Pii Ka Ho.”) Sɛ aber biara ehwɛ nsɛm a wɔdze egu wɛbsaet no do a, ɔbɔboa wo ma eenya nsɛm afofor a ibotum nye nkorɔfo abɔ ho nkɔmbɔ wɔ asɛnka mu.

• Fa nsɛm na video ahorow a ɔwɔ home page hɔ no bi hyɛ nkɔmbɔ ase. Dɛm nsɛm na video ahorow yi botum ama yeehu dza ɔda nyimpa a wɔwɔ hɛn asaasesin mu no hɔn ano.

• Fa nsɛm a ɔwɔ home page hɔ no bi kyerɛ nkorɔfo. Fa nsɛm ahorow a ɔwɔ hɔ no bi kyerɛ nkorɔfo, na kyerɛ hɔn mbrɛ wobesi ahwehwɛ nsɛm ahorow wɔ wɛbsaet no do.

• Fa nsɛm a ɔwɔ hɔ no ne link mona. Nyimpa binom mmpɛ dɛ wɔnye hɛn bɔ nkɔmbɔ enyim na enyim, naaso hɔn enyi gye ho dɛ wɔbɔkɔ hɛn wɛbsaet no do. Ntsi hɔn a wɔkyerɛ asɛm no ho enyigye no, ɔyɛ a fa link ahorow no bi mona hɔn. Obotum ayɛ asɛm bi a ɔda home page hɔ ne link, anaa asɛm pɔtsee bi, anaa video bi a wɔdze ato hɔ a hɔn enyi bɛgye ho.