Asi prèmyé paj a sit Entèwnèt an nou, tini awtik é vidéo ki fèt pou entérésé moun ki sensè (Akt 13:48). Byensouvan, i ka palé dè biten ki fèt pa ni lontan, oben dè biten sé moun-la ni an lèspri a yo é ki ka wouvin adan ti kozé a yo.

Kijan ou pé itilizé prèmyé paj a jw.org an prédikasyon ?

• Pran labitid ay anlè sit-la. Pran tan gadé sé awtik-la ki asi prèmyé paj-la, é mandé-w kijan ou té’é pé itilizé-yo pou édé on moun ki entérésé (pou touvé dòt awtik ki té anlè prèmyé paj-la pa ni lontan, kliké asi « Gadé plis »). Tchenn-vou okouran a sa ki ka pasé anlè sit-la, konsa ou ké ni dé bèl ti lidé asi sa ou pé di an prédikasyon.

• Sèvi èvè sé awtik-la é sé vidéo-la ki asi prèmyé paj-la pou koumansé on ti kozé. Sé zouti-lasa pé ba-w on ti lidé asi sa ki ka enkyété sé moun-la adan téritwa-la.

• Montré sé moun-la prèmyé paj-la. Atiré atansyon a yo asi déotwa sijé, é montré-yo kijan yo pé touvé on enfòwmasyon anlè sit-la.

• Voyé on lyen. Sèwten moun vé pa palé èvè nou, men yo dakò pou ay gadé sit an nou. Alò pa ézité voyé on lyen ba sé moun-la ki entérésé la. Sé pé on lyen ki k’ay asi prèmyé paj-la, oben asi on awtik oben on vidéo a prèmyé paj-la.