Ang home page sang aton website may mga artikulo kag video nga gindesinyo para maganyat ang mga interesado nga indi Saksi. (Bin 13:48) Ang kalabanan nga impormasyon diri parte sa mga balita ukon topiko nga ginaistoryahan ukon ginakabalak-an sang mga tawo.

Paano mo magamit ang jw.org nga home page sa imo ministeryo?

• I-check pirme ang website. Tan-awa ang pinakabag-o nga mga artikulo, kag pamensari kon paano mo ini magamit para buligan ang isa ka interesado. (Para makita mo ang iban pa nga artikulo nga gin-feature sa home page, i-click ang “Tan-awa ang Iban Pa.”) Kon pirme mo gina-check ang website, may bag-o ka pirme nga presentasyon nga magamit mo sa ministeryo.

• Gamita ang mga artikulo kag video nga gin-feature sa home page para makasugod ka sa pag-istoryahanay. Ini nga mga impormasyon makahatag sa aton sing ideya kon ano ang ginakabalak-an sang mga tawo sa aton teritoryo.

• Ipakita sa imo kaistorya ang home page. Ipakita sa iya ang isa ka topiko nga manamian sia, kag tudlui sia kon paano mangita sang impormasyon sa website.

• I-share ang link. Indi gusto sang iban nga makig-istorya sa aton, pero gusto nila nga mag-search sa aton website. Gani puede mo padal-an ang isa ka interesado sang link sa aton home page ukon sang isa ka artikulo ukon video nga gin-feature diri.