Masingattam ta home page na website tam i artikulo anna video ira nga napadday tapenu mala i interes na ari ira tu Saksi ni Jehova. (King 13:48) Gagangay ngana nga masingan taw danari topiko nga mayan na balita onu danari nononopan onu pabbiridan na totolay.

Kunnasim nga usan ta ministeriom i home page na jw.org?

• Kanayummu i-check i website. Innammu nu anni i maddaggun nga naka-feature anna nonopammu nu kunnasim nga usan yatun ta panuffummu ta tadday nga interesadu. (I-click mu i “Innan Paga” tapenu masingammu i karuan ta material nga nikanni laman nga nallawan ta home page.) Nu kanayukka updated ta website tam, kanayun nga bagu i meyusam ta ministerio.

• Usammu i artikulo anna video ira ta home page ta pangigafum tu pakiyuvovug. Makka-ideya ittam tatun ira nga material nu anni i nononopan na totolay ta teritoria tam.

• Ipasingammu i home page. Mangipasingakka tu espesipiko ira nga topiko, anna ipasingammu gapa nu kunnasi nga usan i website.

• Mangi-share ka tu link. Manaki na karuan i makibbida ta nittam ta personal, ngem kayà da gapa nga i-check i website tam. Ari ka gafu nga maggaggag nga mangi-send ta interesadu ira tu link ta home page onu ta espesipiko nga artikulo onu video nga naka-feature tatun.