Ma rẹ jọ oria ọsosuọ jw.org na ruẹ izoẹme gbe ividio nọ a nabe riẹ ru ziezi, nọ e rẹ were ahwo nọ i wo emamọ eva, nọ e rrọ Isẹri Jihova ha. (Iru 13:48) Ẹsibuobu, izoẹme nọ a re fihọ etẹe na yọ eware nọ e be via, nọ ahwo a be ta kpahe hayo roro kpahe.

Kọ ẹvẹ whọ sae rọ rehọ oria ọsosuọ jw.org na ta usi uwoma?

• Hai kpohọ oria itanẹte mai na kẹse kẹse. Muẹrohọ izoẹme nọ e rrọ oria “Eware nọ E Riẹ” na, nọ a re fihọ iẹe no oke te oke na, re who je roro kpahe epanọ whọ sae rọ rehọ ae fiobọhọ kẹ ohwo nọ whọ be ta usi uwoma kẹ. (Re whọ sae ruẹ eware efa nọ a fihọ oria ọsosuọ na, nẹ oria “Ruẹ Efa nọ E Riẹ” na.) Whọ tẹ be hai kpohọ oria itanẹte mai na re whọ ruẹ eware nọ a be hai fihọ iẹe na, u ti fiobọhọ kẹ owhẹ ruẹ eware ekpokpọ nọ whọ sae rọ ta usi uwoma.

• Rọ izoẹme gbe ividio nọ a be hai fihọ oria ọsosuọ na ta usi uwoma. Eware nana e sai fiobọhọ kẹ omai riẹ eware nọ ahwo nọ a rrọ ẹkwotọ nọ ma be jọ ta usi uwoma a bi roro kpahe.

• Dhesẹ oria ọsosuọ na kẹ ahwo. Ta kpahe izoẹme jọ dẹẹ, re who je dhesẹ oghẹrẹ nọ ọ sai ro rovie kpohọ eria sa-sa evaọ oria itanẹte mai na kẹe.

• Vi ilinki se ohwo. U wo ahwo jọ nọ a rẹ gwọlọ keria lele omai ta ẹme Ebaibol ho, rekọ o rẹ were ae re a kpohọ oria itanẹte mai na. Fikiere whọ raha oke he re who vi ilinki nọ ọ rẹ sae wọ ohwo kpohọ oria ọsosuọ jw.org na se ohwo nọ whọ ta usi uwoma kẹ. Whọ sai je vi ilinki nọ ọ rẹ wọ ohwo kpohọ ugogo uzoẹme jọ hayo ividio jọ sei.