ENGEBE YETHU NG’ABAKRISTAYO
Kolesaya Epeji y’Eritsukirako eya JW.ORG omw’Ithulira Lyawu
Epeji y’eritsukirako ey’omuthahulha wethu kuli emyatsi n’esyovidiyo ebikolirwe erihamba okwa b’emithima myolho abathe Bema ba Yehova. (Emib 13:48) Mughulhu mungyi yikakanaya okwa myatsi eyiri omw’amakuru kutse eyo abandu bakalengekanayako n’erikaniako.
Wanga kolesya wuthi epeji y’eritsukirako eya jw.org omw’ithulira lyawu?
-
Ibya iwunemulebya okwa muthahulha mughulhu wosi. Lebaya nga ni mwatsi wahi owabirihirwako n’erilhangira ngoku wanga kolesyagho eriwathikya omundu oyuwanzisibirwe. (Erithoka eribana eyindi myatsi eyahirawa lino-lino okwa peji y’eritsukirako, thulha okwa “Lebaya Ebindi.”) Eribya iwunasi ebihyaka ebiri okwa muthahulha kikendi kuwathikya eribya iwunawithe ebya wanga kolesya omw’ithulira.
-
Kolesaya emyatsi n’esyovidiyo esiri okwa peji y’eritsukirako eritsukisya omukania. Ebi byangana leka ithwaminya ebyo abandu ab’omwa bulhambu bwethu bangabya ibakalengekanayako.
-
Kanganaya abandu epeji y’eritsukirako. Kanaya okwa myatsi mirebe, n’erikangania omundu ngoku angabana omwatsi okwa muthahulha wethu.
-
Thuma e link. Abandi sibalyanza erikania nethu busu okwa busu, aliwe bakabya ibanayitheghekire erighenda okwa muthahulha wethu. Busana n’ekyo isiwasagha erithumira abakanzisibawa e link eyikabathwalha okwa peji y’eritsukirako kutse okwa mwatsi mulebe kutse vidiyo ndebe eyiriko.