Lokasa ya ebandeli ya site Internet na biso ezali na masolo mpe bavideo oyo ebongisami mpo na kobenda bato nyonso ya mitema sembo. (Mis 13:48) Mbala mingi elobelaka masolo oyo ezali na bansango to oyo bato bazali kokanisa mpe kolobela.

Ndenge nini okoki kosalela lokasa ya ebandeli ya jw.org ntango ozali kosakola?

• kotáká site Internet na biso mbala na mbala. Tyá likebi na makambo oyo ezali na eteni bakomi “Bwaká liso awa,” mpe talelá ndenge okoki kosalela yango mpo na kosalisa moto oyo asepeli. (Mpo na kozwa masolo mosusu oyo ezalaki na eteni yango na lokasa ya ebandeli, finá na esika bakomi “Talá masolo mosusu.”) Koyeba ntango nyonso makambo oyo batyaka sika na site Internet ekosalisa yo ozala na makanisi ya sika mpo na mosala ya kosakola.

• Saleláká masolo mpe bavideo oyo batye na lokasa ya ebandeli mpo na kobanda lisolo. Esaleli oyo ekoki kopesa biso makanisi mpo na makambo oyo bato ya teritware na biso mbala mosusu bakanisaka.

• Lakisáká bato lokasa ya ebandeli. Lobelá masolo ya sikisiki, mpe lakisá moto ndenge ya kokɔta na site Internet na biso.

• Tindeláká bato lien. Bato mosusu balingaka te kosolola na biso boye, kasi balingaka kokɔta na site Internet na biso. Yango wana, kokakatana te kotindela bato oyo basepeli lien ya lokasa ya ebandeli to lisolo moko ya sikisiki to video oyo batye na lokasa ya ebandeli.