Ipaagina yoopacera yo nsayitini wihu cinaakumiheriya myaha ni ividiyu cineesiya wiira caacivele atthu oopheela ikhweeli ahikhanle Masaahiti a Yehova. (Mite. 13:48) Mmo, ikwaha cinci cinkhumelaka myaha cohapari awula myaha anoolumaaya atthu cinene.

Manannani nnolamuliyeenyu uvarela nteko ipaagina yoopacera yo nsayitini jw.org wuulalyeerani?

• Nkele nsayitini khula nihuku. Mwiiweehe saana myaha cinkumiheriya ni muupuwele mananna nyuuva mwaahaleenyu uvarela nteko wiira munkavihere ntthu unoncivela wiitthuca. Mwapankaka iyo nyuuva nnaahala ukhalana ankhili akhwaawe oolalyeera.

• Nvarele nteko myaha ni ividiyu cinkumiheriya wiipaceroni wiira mpacere umoopana ntthu mwaha. Nnyo myahannyo pooti unikavihera ukhalana ankhili ni ucuwela itthu atthunaka atthu o ncoko ninlalyeereehu inoopuwelaaya.

• Nwoonihere atthwaayo ipaagina yoopacera yosayitiihu. Munttonkacere vakaani myaha cinoolumiya nsayitini ni mmoonihere mananna oototha myaha cikiina.

• Munveleelihere ilinki. Atthu akiina khunaacivela venci umoopana mwaha Saahiti a Yehova, masi anaatthuna ukela nsayitini wihu. Phimaana, nhihiye waaveleelihera atthu ilinki yo ipaagina yoopacera yo nsayitini awula myaha cikiina ni ividiyu cinoopeliya mwaha.