Kepandja lyetu lyotango lyoko jw.org, oku na iitopolwa nuuvidio mboka wa nyanyangidhwa nelalakano lyokunana aanamitima omiwanawa. (Iil 13:48) Olundji ohaku kala iikundathanwa mboka hayi kala moonkundana nenge mbyoka aantu haya dhiladhila nohaya popi kombinga yayo.

Ongiini to vulu okulongitha epandja lyotango lyoko jw.org muukalele?

• Kala ho tala ko kepandja lyetu lyokointaneta pandjigilile. Kala ho tala shoka shi li ko, e to tala kutya ongiini to vulu oku shi longitha wu kwathele omuntu ngoka e na ohokwe. (Opo wu mone iitopolwa yilwe mbyoka ya li kepandja lyetu lyotango omathimbo opo ga zi ko, thinda “Iikundathanwa yilwe.”) Okukala ho lesha uuyelele wu li pethimbo mboka hawu kala kepandja lyetu, otashi ke ku kwathela wu longithe omadhiladhilo omape muukalele.

• Longitha iitopolwa nuuvidio mboka wu li pepandja lyetu lyotango, wu tameke oonkundathana. Uuyelele mbuka otawu vulu oku tu kwathela tu mone kutya aantu moshitopolwa otayi ipula nashike.

• Ulukila aantu epandja lyotango. Tsa omuthindo iikundathanwa yontumba yokondandalunde, e to ulukile omuntu nkene e na okumona uuyelele kepandja lyetu.

• Mu tumina olinka. Aantu yamwe ihaya kala ya hala okupopya natse oshipala noshipala, ihe ohaya kala ya hala okuya ko kepandja lyetu. Onkee ino kakadhala okutumina omuntu ngoka ta ulike ohokwe olinka yokuya kepandja lyetu lyotango, koshitopolwa shontumba nenge kokavidio kontumba hoka ke li ko.